Эҳтиёт бўлинг бўрилар! Чорвани кўчага чиқармаслик тавсия қилинди
Навоийнинг тоғли ҳудудларида қаҳратон совуқда оч қолган бўрилар галаси чорва молларига ҳужум қилаётгани сабаб Экология бошқармаси чорвани яйловларга чиқармай туришни тавсия қилди.
Бошқармага кўра, ишчи гуруҳ тузилиб, бўрилар ҳужуми билан боғлиқ ҳолатлар ўрганилган. Навоий вилояти Нурота тумани, Самарқанд вилояти Қўшработ туманидаги Қўштомғоли, Чиноқ ва Тепалик қишлоқларида бўрилар ҳужумлари қайд қилинган.
Ўтган ҳафта журналист Толиб Раҳматов ҳам Навоий вилояти Навбаҳор туманининг тоғли ва тоғолди ҳудудларида бўрилар бир ойдан бери чорва молларига ҳужум қилаётгани сабаб юзлаб қўй нобуд бўлганини хабар қилган.
Kun.uz нашри ҳам бўрилар ҳужуми ҳақида ёритди. Нашр хабарига кўра, бўрилар кундуз кунлари ҳам отар оралаяпти, бир ой ичида йиртқичлар ҳамласидан 500 бошдан ортиқ чорва нобуд бўлган.
Чорвоқдаги газ портлашида тўрт киши жароҳатланди
Тошкент вилояти Бўстонлиқ тумани Чорвоқ қўрғонида 30 январь куни икки қаватли уйдаги хонадонлардан бирида газ портлаши оқибатида 4 киши турли даражада жароҳатланди ва касалхонага ётқизилди.
Фавқулодда вазиятлар вазирлигининг билдиришича, газ портлаши натижасида юзага келган кинетик зарба оқибатида хонадоннинг девори ва шифтига шикаст етган.
Сўнгги кунларда Ўзбекистондаги хонадонларда газ портлаётгани тўғрисидаги хабарлар кўпаймоқда.
29 январда Нукуснинг 22-микрорайонида 4 қаватли уйда газ портлагани ва уйнинг томи қулагани ҳақида хабар қилган эди. Уй вайроналари остидан 5 кишининг жасади топилган.
26 январь куни Сирдарё вилоятининг Гулистон шаҳридаги “Ал Хоразмий” кўчасидаги хонадонлардан бирида газ портлаши оқибатида бир киши тан жароҳатлари билан касалхонага ётқизилгани хабар қилинганди.
25 январь куни Қорақалпоғистоннинг Хўжайли туманидаги Солиқ инспекцияси ошхонасида газ чақнаши оқибатида бир киши ҳалок бўлди. Икки киши эса тан жароҳатлари билан туман касалхонасига ётқизилди.
13 январь куни Наманган тумани “Наврўз” маҳалласида газ портлаб, 30 ёшли она ва 8 ёшли бола куйгани ва касалхонага ётқизилгани билдирилган.
Нукусда яна газ портлади, жароҳатланганлар бор
Нукус туманининг “Ақтерек” маҳалла фуқаролар йиғинида жойлашган 2 қаватли уйда 31 январь тонгида газ портлаган. Портлаш оқибатида 4 киши оғир тан жароҳати олган.
Туман ҳокимлиги матбуот хизмати маълумотига кўра, ҳодиса чоғида жабрланганлар Республика шошилинч тиббий ёрдам илмий марказининг Қорақалпоғистон филиалига етказилган, уларга тиббий ёрдам кўрсатилмоқда.
Портлаш ортидан воқеа жойига туман фавқулодда вазиятлар бўлими, ички ишлар бўлими, соғлиқни сақлаш бўлими, прокуратура ва “Ҳудудгазтаъминот” ходимлари етиб боришган, масъуллар ҳодиса сабаби ва кўрилган зарар миқдорини аниқлашяпти, дастлабки суриштирув ишлари олиб борилмоқда.
Нукус шаҳрининг 22-микрорайонидаги тўрт қаватли уйда 29 январь куни газ портлагани, ҳодиса оқибатида 5 киши ҳалок бўлгани ҳақида Озодлик аввалроқ хабар қилган эди.
Мазкур портлаш сабабли уйдаги бир нечта хонадоннинг том ва пол қисмлари ўпирилиб, 4-қаватдан 1-қаватгача тушиб кетгани айтилган. Расмийлар мазкур уйда яшаганлар эвакуация қилингани, улар вақтинча уй-жой ва озиқ-овқат билан таъминланганини билдирганлар.
Президент водийда. Мирзиёев ташрифига эски уйлар ясама деворлар билан ўралди
Ўзбекистонда расмийлар аномал деб атаган совуқ ва энергетик бўҳрон бошланганидан буён президент Мирзиёев илк бор вилоятларга сафар қилди.
Мирзиёевнинг Фарғона водийсига ишчи сафари ҳаво илий бошлаган кунларга тўғри келмоқда.
1 февраль куни Мирзиёев Андижонга борди. Президент матбуот хизмати унинг Фарғона ва Наманган вилоятларида ҳам бўлишини маълум қилди.
Кунлар исий бошлаганига қарамай, энергетик коллапсдан ҳали ўзига келмаган водийликларнинг муаммолари камайгани йўқ. Аммо маҳаллий ҳокимликлар бу муаммоларни ечиш билан эмас, балки, Озодликка келаётган хабар ва тармоқларда тарқалган видеоларга қаралса, президентнинг кўзини бўяш билан банд.
Тармоқларда тарқалган видеода Андижондаги эски уйларни ясама деворлар билан ўраб қўйишгани акс этган.