Нукусда газ портлади: Беш киши ҳалок бўлди
Нукусдаги кўп қаватли уйда газ портлаши оқибатида беш киши ҳалок бўлди.
Фавқулодда вазиятлар вазирлиги хабарига кўра, ҳодиса 29 январь куни соат 16:15 ларда Нукуснинг 22-микрорайонидаги 8/1-уйда юз берган.
Вазирликнинг билдиришича, 30 январь куни 02:30 да қутқарувчилар вайрона остидан 5 ёшли қизни олиб чиққан ва у турли жароҳатлар олгани учун касалхонага ётқизилган. Тонгга яқин уй вароналари остидан яна бир кишининг жасади топилган. Эрталаб қутқарувчилар яна 4 кишининг жасадини топишган.
Қорақалпоғистон Соғлиқни сақлаш вазирлиги портлаш оқибатида 2003 йилда туғилган С.Ш., ҳамда 2004 йилда туғилган З.А., жароҳатланганини маълум қилди. Улар касалхонага ётқизилган.
Республика тезкор штаби берган маълумотда қайд этилишича, уйдаги бир нечта хонадоннинг том ва пол қисмлари ўпирилиб, 4-қаватдан 1-қаватгача тушиб кетган.
Портлаш юз берган уйда яшаганлар эвакуация қилингани, улар вақтинча уй-жой ва озиқ-овқат билан таъминлангани айтилмоқда.
Айни пайтда воқеа жойида қутқарувчилар ва махсус техника ишламоқда.
“Воқеа жойида фавқулодда вазиятлар вазири бошчилигида ҳодиса оқибатларини бартараф этиш ишлари давом этмоқда”, дейилади вазирлик билдирувида.
Тошқин ва кўчки олдини олиш штаби тузилди
Ўзбекистонда сел, тошқинлар ва кўчки билан боғлиқ фавқулодда вазиятлар олдини олиш бўйича штаб ташкил этилди.
Бош вазир матбуот хизмати масъули Бекзод Ҳидоятовга кўра, штаб президент Шавкат Мирзиёевнинг топшириқларига асосан ташкил этилган ва Вазирлар Маҳкамасида Бош вазир Абдулла Арипов раислигида бўлиб ўтган йиғилишда штаб тузилган.
“Ўзгидромет”нинг маълумотига кўра, шу ҳафтадан ҳаво ҳарорати кундузи +10 даражагача кўтарилади.
Ҳаво ҳароратининг кўтарилиши натижасида қор ва музлар эриши тезлашиб, сел, кўчки ва сув тошқинлари юзага келиши эҳтимоли мавжуд.
Жорий йилда Амударё ва бир қанча каналлар музлаб қолгани маълум.
Ўтган ҳафта қўшни Туркманистонда Қорақум каналининг Марв вилояти Туркманқалъа этрапи ҳудудидан ўтувчи қисмида сув тошиб, Ничка қишлоғидаги 10 та хонадоннинг молхоналарини сув босди.
“Ўзгидромет” жорий ҳафта Самарқанд, Жиззах, Тошкент вилоятларида кучли ёмғир бўлишини хабар қилган. Бу эса сел келиш хавфини кучайтиради.
Ўзбекистонда кейинги ўн йилликда кузатилган энг катта тошқин Сардоба сув омбори тўғонининг бузилиши оқибатида келиб чиққан.
2020 йил майидаги ушбу ҳодисада юзлаб одам эвакуация қилинган, ўнлаб киши бошпанасидан айрилган эди.
Ўтган йилнинг майида Сурхондарёнинг Сариосиё туманида сел килиши оқибатида икки киши ҳалок бўлган эди.
Ўтган йил апрелида эса Жиззах вилояти Эгизбулоқ маҳалласида 70 дан ортиқ қабрни сел оқизиб кетган.
Чинозда муз орасида қолиб кетган машина эгаси қутқарилди
Тошкент вилоятининг Чиноз туманида муз орасида қолиб кетган Lacetti ҳайдовчиси қутқарилди.
Тошкент вилояти ҳокимлиги ахборот хизмати хабарига кўра, воқеа 26 январь куни соат 10:00 да содир бўлган.
Расмий хабарда айтилишича, Чирчиқ дарёсининг Чиноз тумани ҳудудидан оқиб ўтувчи қисмида сув сатҳи кўтарилиб, қирғоқдан тошган ва тумандаги “Чинмасжид” маҳалласи ҳудудидаги йўлда кўлмак ҳосил қилган ва совуқ ҳарорат таъсирида музлаган:
“Тошкент шаҳрида бўлган фуқаро Lacetti русумли автомашинасида мазкур маҳалладаги дала ҳовлисига кетаётган вақтида музлаган кўлмак устидан ҳаракатланган. Машинанинг оғирлигига дош бера олмаган муз ёрилиши оқибатида автомашина ўша жойда қолиб кетган”.
Қутқарувчилар ҳайдовчини қутқаришган ва музда қолиб кетган машина ҳам чиқариб олинган.
Чиқинди газидан электр олиш заводи қурилиши бошланди
Тошкент вилоятида «Оҳангарон» ва «Майдонтол» полигонларидан чиқадиган газни қайта ишлаб электр энергияси олиш бўйича тўрт йил аввал тасдиқланган лойиҳа бўйича ниҳоят қурилиш ишлари бошланди.
Табиат ресурслари вазирлиги хабарига кўра, 26 январь куни мажмуа қурилишига тамал тоши қўйилган.
55 миллион долларлик лойиҳа учун Жанубий Кореянинг Sejin G&E компанияси инвестиция киритган.
Режага кўра, 2018 йилда имзоланган ушбу лойиҳа аллақачон ишга туширилиши лозим эди. Вазирлик нима сабабдан лойиҳа тўхтаб қолганига аниқлик киритмаган.
Бу завод ишга туширилгач, маиший чиқиндидан электр ишлаб чиқарадиган Марказий Осиёдаги ягона завод бўлиши айтилмоқда.
Расмийлар заводнинг қачон ишга туширилишини очиқламаган.