Совуқ қотганлар исиниши ва овқатланиши учун чодирлар қурилди
Жаҳонгир Ортиқхўжаев ишдан олинганининг эртасига пойтахт кўчаларида ҳарбий чодирлар пайдо бўлди.
Расмий хабарга кўра, бу чодирлар Мудофаа вазирлиги томонидан одамлар исиниши учун ташкил қилинган.
Пойтахтнинг 11 та туманида жами 19та шундай чодирлар қурилган. Чодирлар манзили пойтахт ҳокимлиги Телеграм каналида эълон қилинди.
Бу чодирларда совуқ қотган одамлар исиниб олиши мумкин. Чодирга кириб, нафақат исиниш мумкин, балки овқатланиш мумкин. Кунига уч маҳал иссиқ овқат ташкил қилинган.
Агар вақтингиз бемалол бўлса, ҳатто ўтириб китоб ўқишингиз, шахмат-шашка ўйнашингиз ҳам мумкин.
Бу каби чодирлар вилоятларда ҳам қурилгани хабар қилинди. Бутун мамлакат бўйлаб жами қанча чодир борлиги номаълум
Бу чодирлар неча кун давомида фаолият кўрсатиши номаълум. Чодирлар Мудофаа вазирлиги томонидан ташкил қилингани айтилди. Лекин бошқа харажатлар кимнинг ҳисобидан экани номаълум. Худди Ортиқхўжаевнинг беш кунлик бепул ошлари сингари, расмийлар чодирлар билан боғлиқ ҳаражатлар миқдори ва манбаини ҳозирча ошкор қилишмади.
Қўшниларда нима гап?
Марказий Осиё минтақасига Россия ҳудудидан ўтган ҳафта кириб келган арктик циклон нисбатан илиқ ўлкалар бўлган Ўзбекистоннинг бешта қўшниси Қозоғистон, Туркманистон, Тожикистон, Қирғизистон ва Афғонистонни ҳам қамраб олган.
Ўзбекистондаги каби энергетик коллапс қўшни Афғонистонда ҳам кузатилмоқда.
Толибон ҳукумати вакилларига кўра, Афғонистонда аномал совуқ туфайли камида 16 киши қурбон бўлган, 3-4 минг бош қорамол нобуд бўлган.
Тармоқларда афғон фойдаланувчилари аномал совуқдан жабр кўрганлар сони Толибон вакиллари очиқлаётганидан анча кўп бўлиши мумкинлиги ҳақидаги тахминларни илгари суришяпти. Мамлакат аҳли энергетик муаммолардан азият чекмоқда.
Қирғизистонда ҳам совуқ об-ҳаво сабаб вазият анча жиддийлашган. Беш кун аввал Майлуу-Суу шаҳрида фавқулодда ҳолат эълон қилинди. Қаҳратон совуқ сабаб шаҳардаги сув қувурлари музлаб қолгани оқибатида шаҳар аҳли иссиқлик тизими ва ичимлик сувидан ажралиб қолди.
Фавқулодда вазиятлар хизмати шаҳар аҳолисига сув олиб келиб беришга ва навбати билан иссиқлик етказиб беришга ҳаракат қилаётгани хабар қилинди.
Аномал совуқ сабаб мамлакатнинг учта вилоятидаги мактаблар онлайн ўқишга ўтказилди.
Сўнгги хабарларга кўра, совуқ сабаб Иссиқкўл ҳам музлаб қолган. Иссиқкўлда кейинги бир неча ўн йилликда умуман музлаш ҳолати кузатилмаганди.
Қўшни Тожикистон эса Ўзбекистондан фарқли совуқ бошланиши билан электр энергияси чекловларини бекор қилди.
Кеча эса суюлтирилган газ нархи қарийб ярим баробар арзонлагани хабар қилинди.
Айни пайтда мамлакатнинг айрим ҳудудларида, жумладан, пойтахт Душанбеда ҳам электр узилишлари бўлаётганидан шикоятлар бор.
Туркманистонда ҳам 20 даража совуқ. Ўзбекистоннинг асосий газ ва
электр импортчиси бўлган Туркманистоннинг ўзида ҳам энергетик муаммолар кузатилмоқда. Хабарларга кўра, пойтахт Ашхободнинг айрим уйларида сув қувурлари музлаб қолган, иситиш тизими ҳам яхши ишламаяпти. Мамлакатнинг турли шаҳарларида электр энергияси ва иситиш тизимида муаммолар кузатилмоқда.
Жумладан, Мари шаҳрида совуқ сабаб сув таъминоти ва иссиқлик тизими ишдан чиққан. Шунингдек, шаҳарда газ етишмовчилиги муаммоси ҳам борлиги айтилмоқда.
Қозоғистоннинг айрим ҳудудларида ҳаво ҳарорати 30 даража совуқдан юқорини ташкил қилмоқда. Ўзбекистондан фарқли Қозоғистонда энергетик коллапс мавжуд эмас. Бироқ мамлакатнинг айрим ҳудудларида иссиқлик тизими яхши ишламаётганидан шикоятлар бор.
Жумладан, Қарағанда вилоятининг Темиртау шаҳри фаоллари шаҳарда иссиқлик тизими яхши ишламаётгани сабаб мулозимларни судга беришди.
Ўтган ой қамалган Музаффар Алиев озод қилинди
Ўтган йил 11 декабрь куни президент администрацияси раҳбари Сардор Умурзоқов ўтказган видеоселекторда қўлига кишан солинган «Ҳудудгазтаъминот”нинг Тошкент вилоят бўлими бошлиғи Музаффар Алиев эсингиздами?
Тошкент вилояти прокуратурасининг билдиришича, Алиевга нисбатан қамоқ кўринишидаги эҳтиёт чораси ўзгартирилган.
Озодлик манбасига кўра, Алиев январь ойи бошида қамоқдан чиқарилган ва кейин касалхонада даволанган.
11 декабрь кунги йиғилишда Бош прокурор Ниғматилла Йўлдошев Музаффар Алиевга нисбатан жиноят иши очилганини маълум қилган эди.
Озодлик манбалари Алиев Президент Администрацияси раҳбари Сардор Умурзоқовнинг буйруғи билан ҳукумат мажлисидан қўлига кишан солинган ҳолда олиб чиқиб кетилганини айтишган.
Йиғилиш давом этиб турган бир пайтда маҳаллий матбуот Музаффар Алиевнинг қўлига кишан солингани акс этган суратини эълон қилган.
Ҳозирда Алиевга қарши очилган жиноят иши доирасида тергов ҳаракатлари давом этаётгани айтилмоқда.
Айни пайтда энергетик бўҳрон сабаб 16 январь куни президент Мирзиёев томонидан лавозимидан четлатилган Тошкент шаҳрининг собиқ ҳокими Жаҳонгир Ортиқхўжаевнинг кейинги тақдири номаълум қолмоқда. Унинг хорижга чиқиб кетишга уринган пайтда Тошкент халқаро аэропортида қўлга олингани ҳақида маҳаллий матбуотда пайдо бўлган хабар расман тасдиқланмаган.
Қозоғистон ва Россия газ бўйича «йўл харитаси»ни имзолади
Қозоғистон ва Россия газ етказиб бериш бўйича «йўл харитаси»ни имзолади.
Қозоғистон бош вазирининг расмий сайтида эълон қилинган хабарга кўра, “йўл харитаси” 18 январь куни Санкт-Петербургда Қозоғистон бош вазирининг биринчи ўринбосари Роман Скляр ва «Газпром» раҳбари Алексей Миллер ўртасида имзоланган.
Учрашувда Оренбургда қозоқ газини қайта ишлаш, Россия газини Қозоғистонга етказиш масаласи муҳокам қилинган.
Бошқа тафсилотлар маълум эмас.
Куни кеча ўзбек матбуоти Россия худди шундай келишув учун ўзбекистонга шарт қўйгани ҳақида ёзганди.
Gazeta.uz хабарига кўра, Россия томони рус газини Ўзбекистонга Қозоғистон орқали етказиб беришни таклиф қилган. Бироқ нашр манбаларига кўра, Россия томони бунинг учун иккита шарт қўйган. Биринчиси, Ўзбекистоннинг газ-транспорт тизимини бозор нархида “Газпром”га топшириш, иккинчиси, Хитойга газ экспорти шартномасидаги Ўзбекистон ҳуқуқини ҳам Россияга топшириш бўлган.
Энергетика вазири Жўрабек Мирзамаҳмудов ўтган ойдаги чиқишларидан бирида буни билвосита тасдиқлаган.
Kun.uzнинг Ўзбекистон ҳукуматидаги манбаларига кўра, расмий Тошкент Россия томонининг шартларини қабул қилмаган.