Украина армияси озод этилган ҳудудларда россиялик ўқитувчиларни қўлга олди
Украин қўшинларининг қарши ҳужуми чоғида ушланган россиялик ўқитувчилар Жиноят кодексининг уруш қонунлари ва одатларини бузиш ҳақидаги 428-моддасига асосан суд қилинади, деди бош вазир ўринбосари Ирина Верешчук.
Купянскда ўқитувчилар қўлга олингани тўғрисида 10 сентябрь куни “24-канал” разведкадаги ўз манбасига таяниб хабар тарқатган эди. Манба рус ҳарбийлари шаҳардан чекинар экан, ўқитувчиларни унутганини айтган.
“Улар бизнинг давлатимизга қарши жиноят содир этишди. Украина ҳудудига келиб, бу ерда ноқонуний фаолият олиб боришга розилик берган Россия фуқароларини кўп марталаб огоҳлантирганмиз. Жазо чорасини суд белгилайди. Аммо уларга ҳеч ким ҳарбий асир деб қарамайди, чунки улар комбатантлар эмас, ҳарбий асир бўлмаганларни айирбошлаш Женева конвенциясида назарда тутилмаган”, дея таъкидлади Верешчук.
Ўқитувчилар 8 йилдан 12 йилгача муддатга озодликдан маҳрум этилиши мумкин. Қўлга олинган россиялик ўқитувчилар сони ва уларнинг исм-фамилиялари очиқланмаган.
Россия маориф вазири Кравцов босиб олинган ҳудудларда дарс берган россиялик ўқитувчилар “ҳозирда Россия ҳарбийлари назоратидаги ҳудудларда” эканини айтди.
Оккупация маъмуриятининг исми сир тутилган вакили эса “Интерфакс” агентлигига “Купянскда Россия дастури бўйича дарс бергани учун жавобгарликка тортиш мумкин бўлган россиялик ўқитувчилар бўлмаган”ини билдирган.
Озод этилган Изюмда В.Зеленский Украина байроғини кўтарди
14 сентябр куни украиналик десантчилар томонидан озод қилинган Изюмда Украина байроғи кўтарилди. Тадбирда Украина президенти Владимир Зеленский, Мудофаа вазири ўринбосари Анна Маляр ва бошқа расмийлар иштирок этди. Тадбир жангларда ҳалок бўлган украин аскарларини хотирлаш дақиқаси билан бошланди.
10 сентябр куни шаҳар рус босқинчиларидан озод қилинди.
25-алоҳида десант-десант бригадасининг хабар беришича, Украина Президенти озод қилинган Украина ерлари учун аскарларга миннатдорчилик билдирди ва Украина байроғини тантанали равишда шаҳар кенгаши тепасига кўтарди.
А.Арестович: Россия босқинчилари фронтнинг 20 км участкасидагина ҳужум қилишга уринаётган
Бахмут ҳудудидаги фронтнинг 20 км участкаси Россия босқинчилари ҳужум қилишга уринаётган ягона жой. Бу ҳақда Украина президенти маъмурияти маслаҳатчиси Алексей Арестович маълум қилди.
- Улар катта ресурсларни у ерда жамлаган, босим ўтказишга ҳаракат қилмоқда, чунки ҳеч бўлмаганда операцион муваффақиятга эришиш керак... Эслатиб ўтаманки, фронт узунлиги 1390 км ташкил этади. Бу фронтнинг 20 км қисмидагина улар ҳужумга ўтишга уринмоқда, деди блогер Фейгин эфирида президентт маслаҳатчиси.
Шу билан бирга, Арестовичнинг сўзларига кўра, русларнинг Бахмут ҳудудидаги муваффақиятлари ҳақидаги баёнотлари ҳақиқатдан йироқ.
New York Times: Украинанинг Россияга қарши ҳужуми АҚШ ва Британия мутахассислари ҳамкорлигида ишлаб чиқилган
Украина армиясининг мамлакат шимоли-шарқи ва жанубидаги муваффақиятли қарши ҳужумлари режаси украин ҳарбийлари томонидан америкалик ва британиялик мутахассислар ҳамда расмийлар билан ҳамкорликда ишлаб чиқилган. Бу ҳақда New York Times газетаси АҚШ ҳукуматидаги ўз манбаларига таянган ҳолда хабар берди.
New York Times ёзишича, президент Зеленский фармойишига биноан Украина Қуролли Кучлари Бош штаби томонидан ишлаб чиқилган дастлабки режага кўра украин армияси мамлакат жанубида кенг кўламли қарши ҳужумга ўтиши ва Херсон шаҳрини озод этиб, Мариуполни шарқдаги Россия кучларидан узиб қўйиши керак эди.
Бироқ ёзда украин ва америкалик ҳарбийлар томонидан ўтказилган ҳарбий машқларда бунақа ҳужум катта эҳтимол билан муваффақиятсиз якунланиши маълум бўлган. Пентагон раҳбарларидан бири бўлмиш Колин Калнинг айтишича, бу машқлар қарши ҳужумнинг нисбатан самарадор вариантларини топиб, Украина раҳбарияти ва олий қўмондонлигига тақдим этиш имконини берган.
Кал бир қанча вақтдан сўнг айнан Украина раҳбарияти ҳарбий амалиётнинг якуний режасини ишлаб чиққанини урғулайди. Икки йўналишда – шимол ва жанубда ҳужумга ўтиш айнан украин ҳарбийларининг таклифи бўлган.
Август ойи мобайнида Украина АҚШдан батафсил разведка маълумотларини олиб, Россия мудофаасининг энг заиф нуқталарини ўрганган ва қарши ҳужумга ўтилган тақдирда Россия армияси бу нуқталарга мадад кучларини ташлашга улгурмаслигига ишонч ҳосил қилган. Ҳужум муваффақиятини таъминлаш учун Қўшма Штатлар Киевга кўпроқ қурол-аслаҳа юборишни бошлаган.