Киевда сув учун турнақатор навбатлар пайдо бўлди
Киевликлар сув олиш учун соатлаб навбат кутишга мажбур бўлишмоқда. Россиянинг ракета зарбаларидан сўнг Киевнинг сув ва электр таъминоти ишдан чиққан.
Душанба куни эрта тонгда Россия қанотли ракеталар ва дронлар билан Киев, Харков ва Украинанинг бошқа шаҳарларидаги муҳим инфратузилма обьектларига зарба берди.
Владимир Путин Сочидаги матбуот анжуманида журналистлар саволига жавоб бераркан, бу ҳужумлар Украинанинг Россия Қора денгиз флотига ҳужумига жавоб эканини иддао қилди.
Киев Қрим кўприги ва Қора денгиз флотини нишонга олганини ҳеч қачон тасдиқламаган.
"Мушт еган" Путин
Киевда Хеллоуин байрами пайти Россия президенти Владимир Путиннинг турли хил кўринишдаги чучелаларилари пайдо бўлди.
Тулумларнинг биттасида Путин қафасда ўтирган ҳолда акс эттирилган.
"Чучелалар бу одам ва унинг армиясининг келажаги қандай бўлишини кўрсатяпти. Тез орада бунга гувоҳ бўламиз деб умид қиламан", деди киевлик Павло Лутов.
Тарқалган видео ва фотоларда одамларнинг Путин чучеласини тепаётгани ёки муштлаётгани акс этган.
"Сотқин ўқитувчилар"га қарши 12 та иш очилди
Харьков вилояти полициясининг тергов бошқармаси бошлиғи Сергей Болвинов вилоятнинг босиб олинган ва сўнгра озод этилган қишлоқ ва шаҳарларда Россия оккупация маъмурияти билан ҳамкорлик қилган ўқитувчиларга қарши 12 та жиноят иши очилганини маълум қилди.
“Россияликлар ва уларга хизмат қилган коллаборантлар украин тилини тақиқлаганлар, мактабларда украинча дарсликларни ёқиб юборганлар, Изюм шаҳридаги украиншунослик музейи экспонатларини йўқ қилганлар. Шу тариқа “Рус дунёси”ни ерлаштирмоқчи бўлишган”, деб ёзди Болвинов. Унга кўра, айрим ўқитувчилар Украина ҚК қарши ҳужуми чоғида Россия қўшинлари билан қочиб кетган.
Полтавага 4та дрон ҳужум қилди
Полтава вилояти ҳарбий маъмурияти раҳбари Дмитрий Лунин ўтган кечаси бўлган ҳужум чоғида “душманнинг тўртта дрони фуқаровий объектларга қулаган”ини билдирди.
Мулозим улар айнан қанақа дронлар эканини очиқламаган. Бироқ ўзиучар аппаратлар қулаб тушган жойларда ёнғин чиққани маълум. Айтилишича, қурбонлар йўқ.