Чавушўғли Туркия расмий Тошкентнинг Қорақалпоғистонда хавфсизликни таъминлашга оид ҳаракатларини қатъий дастаклашини билдирди
Туркия Ўзбекистон томонидан Қорақалпоғистон Республикасида тинчлик, хавфсизлик ва жамоат осойишталигини таъминлаш, ушбу ҳудуднинг барқарор ривожланишини ҳар томонлама қўллаб-қувватлаш мақсадида амалга оширилган қатъий чора-тадбирларни қўллаб-қувватлайди. Бу ҳақда Туркия ташқи ишлар вазири Мевлут Чавушўғли 4 июль куни ўзбекистонлик ҳамкасби Владимир Норов билан телефон орқали мулоқот чоғида билдирган.
Ўзбекистон ТИВ матбуот хизмати маълумотига кўра, мулоқот чоғида Ўзбекистон ва Туркия ўртасида олий даражадаги учрашувларда эришилган келишувларни ўз вақтида ва тўлақонли амалга ошириш муҳимлиги қайд этилган.
Ўзбекистон ва Туркия бош дипломатлари икки ва кўп томонлама шаклдаги режалаштирилган тадбирларнининг ташкилий ва мазмуний жиҳатларини кўриб чиққанлар. Шу жумладан, мулоқот пайтида Тошкент шаҳрида ўтказилиши кутилаётган ташқи сиёсат, иқтисодиёт ва транспорт масалалари учун масъул идоралар раҳбарлари даражасидаги “Ўзбекистон – Озарбайжон – Туркия” уч томонлама учрашувига тайёргарлик жараёни муҳокама қилинган.
Фавқулодда ҳолат тартиби Тошкент – Нукус авиақатнови жадвалига ҳам ўзгартиш киритди
Қорақалпоғистонда бир ойга фавқулодда ҳолат тартиби эълон қилиниши ортидан Тошкент-Нукус-Тошкент йўналиши бўйлаб авиақатнов вақтига ўзгартириш киритилган.
Uzbekistan Airways ахборот хизмати маълумотига кўра, жорий йил 4 июлидан 2 августига қадар HY017/018 рейслари Тошкентдан Нукусга аввалгидай соат 20:00 да эмас, балки соат 16:20 учиб, Нукусга соат 18:00 да (аввал учоқ Қорақалпоғистон марказига соат 21:40 да қўнар эди) етиб боради, Нукусдан эса учоқ Тошкентга соат 18:50 да (22:30 ўрнига) қайтиб, Ўзбекистон пойтахтига соат 20:10 да (23:50 ўрнига) етиб келади.
Uzbekistan Airways вакиллари жадвалга киритилган ўзгартиш сабабини очиқламаган бўлсалар-да, бунинг Қорақалпоғистонда якшанбадан бошлаб амал қила бошлаган фавқулодда ҳолат тартиби билан боғлиқлигини тахмин қилиш қийин эмас.
Қорақалпоғистонда президент фармони билан шу йил 3 июлидан 2 августигача фавқулодда ҳолат тартиби жорий этилгани ҳақида Озодлик аввалроқ хабар қилган. Ҳужжатга мувофиқ, фавқулодда ҳолат даврида соат 21:00 дан соат 7:00 га қадар комендантлик соати жорий этилган.
Нукусда комендантлик тартибини бузган 110 нафар фуқаро ушланди
Миллий гвардия матбуот котибининг 4 июль куни АОКАда ўтган брифингда маълум қилишича, Қорақалпоғистонда фавқулодда ҳолат эълон қилингандан сўнг, комендантлик тартибини бузган 110 нафар киши ушланган. 12 та транспорт воситаси жарима майдонига қўйилган.
Жумладан, Нукус шаҳрида патруллик хизмати давомида комендантлик соатига риоя қилмаган 58 нафар киши ушланган.
Улардан 28 нафарига нисбатан Маъмурий жавобгарлик тўғрисидаги кодексининг 204-моддаси (Фавқулодда холат тартибининг талабларини бузиш) бўйича маъмурий баённомалар расмийлаштирилган. Қолганлар билан пррофилактика суҳбатлари ўтказилиб, соат 7:00 дан кейин қўйиб юборилган.
Норозиликлар ортидан Қорақалпоғистонда бир ойлик фавқулодда ҳолат жорий этилган. Фавқулодда ҳолат 3 июль соат 00:01 дан 2 август соат 00:00 га қадар давом этади, бу даврда соат 21:00 дан 7:00га қадар комендантлик соати жорий этилди. Миллий гвардия қўмондони Рустам Жўраев комендант этиб тайинланган.
ЕИ Нукус воқеаларини мустақил тергов қилишга чақирди
Европа Иттифоқи Қорақалпоғистонда рўй берган қонли воқеаларни очиқ ва мустақил тергов қилишга чақирди.
Ташкилот баёнотида Ўзбекистон халқаро мажбуриятларига биноан фундаментал инсон ҳуқуқлари, хусусан сўз эркинлиги ва йиғилиш эркинлигини таъминлашга чақирилган:
«Биз таклиф этилган конституциявий ўзгаришларга нисбатан жамоатчилик хавотирларига президент Мирзиёев томонидан тезкор реакция билдирилганини олқишлаймиз. Барча томонларни низо кескинлашиши ва зўравонликлар давом этишининг олдини олиш мақсадида ўз ҳаракатларида вазминликка чорлаймиз».
4 июль куни Европа кенгаши Президенти Шарль Мишель президент Шавкат Мирзиёев билан телефон мулоқоти пайти Нукусдаги тартибсизликларни бузғунчи кучлар томонидан уюштирилган дея баҳолаган. Бу ҳақда president.uz хабар қилди:
«Қорақалпоғистондаги вазиятнинг баъзи бузғунчи кучлар томонидан издан чиқарилишига йўл қўйиб бўлмаслиги алоҳида қайд этилди. Шарль Мишель жиноий унсурлар томонидан уюштирилган тартибсизликлар натижасида қурбон бўлганларнинг оилалари ва яқинларига ҳамдардлик сўзларини етказишни сўради».
Суҳбат чоғида Марказий Осиё минтақасида юзага келаётган вазият ҳамда ЕИ тузилмалари билан кўп томонлама мулоқотнинг даражасини янада юксалтириш юзасидан ҳам фикр алмашилган.