Бишкек вақти билан соат 15.00 да Азимжон Асқаровнинг иши бўйича Қирғизистон Олий судида маҳкама давом этди. Бироқ жабрланувчилар судга келмаганлари туфайли маҳкама эртанги кунга, яъни 12 июлга кўчирилди.
Германия канцлери Ангела Меркелнинг Қирғизистонга ташрифи ва Азимжон Асқаров ишининг Олий судда кўрилиши ўртасида алоқа йўқ. Бу ҳақда Қирғизистон президенти аппаратининг ташқи сиёсат бўлими мудири Сапар Исақов Бишкекда бўлиб ўтган брифингда маълум қилди.
Ангела Меркель Қирғизистонга 13-14 июль кунлари расмий сафар билан келаяпти. Ташриф доирасида Германия канцлерининг Қирғизистон президенти Алмазбек Атамбаев, Жўғўрқу кенеш спикер Чинибай Турсунбеков етакчилигидаги парламент делегацияси ва фуқаровий жамият вакиллари билан учрашиши кутилмоқда.
Аввалроқ қароргоҳи Нью-Йоркда жойлашган Журналистларни ҳимоя қилиш қўмитаси Ангела Меркелга мурожаат қилиб, Азимжон Асқаровни озод қилиш масаласи бўйича Қирғизистон расмийларига таъсир ўтказишга чақирганди.
Қирғизистон Олий Судида бугун Азимжон Асқаров ишини кўриш давом этади. Кеча ўзини жабрланувчи, деб ҳис қилувчи томон судга келмагани учун жараён тушдан кейин 12 июлга қолдирилган эди.
Бугун ўзини жабрланувчи деб ҳисобловчи Чинара Бечелова судга албатта келишини маълум қилди. Чинара Бечелова 2010 йилда милиция ходими бўлган турмуш ўртоғининг ўлдирилишида Асқаровни айбдор, ҳисоблайди. Бироқ халқаро ташкилотлар Асқаровга нисбатан жиноят иши соҳталаштирилганига ишонилишини айтиб келади.
Олий Судда Асқаров ишини кўриб чиқиш бошланди. Суд 11 июль куни ҳимоя томони тингланганнии эслатиб, жараённи жабрланувчи томонга сўз беришдан бошлади.