Тошкент шаҳри Шайхонтоҳур туманидаги 4-сонли ИИБ бошлиғи ўринбосари фоҳишахона ташкил қилган аёлдан пора олгани ортидан икки йилга қамалди.

Ушбу жиноят ишини кўриб чиққан Олмазор тумани суди судьяси А.Саидов ИИБ мулозимини икки йил муддатга ҳуқуқни муҳофаза қилувчи органлар тизимида ишлаш ҳуқуқидан ҳам маҳрум қилган, дея хабар қилди Daryo.uz.

Суд ҳужжатларида баён қилинишича, 31 ёшли судланувчи 2023 йил сентябрь ойидан Шайхонтоҳур туман ИИО ФМБ 4-сонли ИИБ бошлиғи ўринбосари лавозимида ишлаб келган. ИИБ мансабдори Ф. А. исмли аёлнинг туман ҳудудида фоҳишалик билан шуғулланиб келишига шароит яратиб бериш, унга нисбатан қонуний чора кўрмаслик ҳамда ушбу ноқонуний фаолиятига раҳнамолик қилиб туриши эвазига ундан ҳар ойда 1500 доллардан пул талаб қилган.

ИИБ бошлиғи ўринбосари 2024 йил 14 август куни хизмат хонасида аёлдан пора тариқасида биринчи улушини олган вақтида ашёвий далиллар билан ушланган.

Аввалроқ Озодлик Андижон туманидаги профилактика инспектори бангфурушга кўмаклашгани ортидан 10 йил 2 ой муддатга қамалгани ҳақида хабар қилган эди.

Ўзбекистон президенти Шавкат Мирзиёев 20 ноябрь куни Олий Мажлис Қонунчилик палатасининг мажлисидаги нутқида мамлакат ҳукуматининг келгуси беш йилдаги устувор вазифаларини эълон қилди.

Қайд этилишича, Абдулла Арипов бошчилигидаги янги ҳукумат ислоҳотлар шиддатини пасайтирмай, 2030 йилга бориб, иқтисодиёт ҳажмини 200 миллиард долларга етказиши зарур.

Шунингдек, макроиқтисодий мувозанатни сақлаб, келгуси беш йилда иқтисодий ўсиш суръатини 6-7 фоиз атрофида таъминлаш, инфляция даражаси 5-6 фоиз, бюджет тақчиллиги 3 фоиз доирасида бўлишига эришиш лозим.

Йиллик кредитлаш ҳажмини эса 30 миллиард долларга олиб чиқиш асосий вазифа саналади.

Келгуси беш йилда ҳукумат камида 100 миллиард долларлик хорижий инвестицияларни ўзлаштириб, йиллик экспорт ҳажмини 45 миллиард долларга олиб чиқиши, унда тайёр маҳсулотлар улушини 50 фоизга етказиши кўзда тутилган.

Бундан ташқари, хорижий туристлар оқимини 15 миллион нафарга, туризм хизматлари экспортини 5 миллиард долларга олиб чиқиш белгиланган.

Мирзиёев таъкидича, келгуси 5 йилда мамлакат аҳолиси сони 40 миллиондан ортиши камбағалликни қисқартириш, экология, энергетика, транспорт, йўл, ичимлик сув, аҳолини уй-жой билан таъминлаш каби соҳаларда долзарб вазифалар қўяди.

Янгидан сайланган парламентнинг 20 ноябрдаги йиғинида Абдулла Арипов учинчи муддатга бош вазир этиб маъқулланди.

Айни пайтда жамоатчилик фаоллари Ўзбекистонда йирик бизнес, жумладан, олигархик гуруҳларнинг ҳукумат қарорларига босими ва зарарли таъсирини камайтириш бўйича қонунчилик чекловларини киритиш вақти келганини айтишмоқда.

2025 йилдан Россия ва Ўзбекистон прокуратура тизими ходимларининг ўзаро тажриба алмашуви ва малака ошириши йўлга қўйилади. Бу ҳақда Россия бош прокурори Игорь Краснов Тошкентда 20 ноябрь куни ўзбекистонлик ҳамкасби Ниғматилла Йўлдошев билан учрашувда гапирган.

Ўзбекистон бош прокурори таклифига кўра Тошкентга келган Краснов “фуқаролар ҳуқуқларини ҳимоя қилиш ва жиноятчиликка қарши курашиш механизмларини такомиллаштириш бўйича кейинги қўшма қарорларни ишлаб чиқиш бўйича фикр алмашади”.

Маҳаллий матбуотнинг ёзишича, Краснов Йўлдошев билан учрашувда Россия Ўзбекистоннинг рақамлаштириш бўйича тажрибасидан фойдаланиш ниятида эканини қайд этган.

Россиялик меҳмон МДҲ мамлакатлари бош прокурорлари мувофиқлаштирувчи кенгаши фаолиятини такомиллаштириш кераклигини ҳам урғулаган.

2024 йил апрель ойида Москвада бўлиб ўтган учрашувда Россия ва Ўзбекистон бош прокурорлари идоралараро ҳамкорлик дастурини имзолаганди.

Эслатиб ўтамиз, АҚШ ва Европа Иттифоқи 2021 йил март ойида “Навальний иши” доирасида Россия бош прокурори Игорь Красновга нисбатан санкция жорий қилган.

АҚШда таҳсил олаётган ўзбекистонлик талабалар сони 2023-2024 ўқув йилида 1219 нафарни ташкил этган. Халқаро таълим институти томонидан ҳозирланган “Очиқ эшиклар” ҳисоботига кўра, бу ўтган йилга нисбатан 11,9 фоизга кўпдир.

Океан ортидаги ўзбекистонлик талабаларнинг 703 нафари бакалавриат, 350 нафари магистратура босқичида таҳсил олмоқда. 134 нафар талаба факультатив ўқув курсларига, 32 нафари эса нодавлат таълим йўналишларига қабул қилинган.

Халқаро таълим институти ҳисоботида қайд этилишича, жорий ўқув йилида АҚШ университетларида жами 1,1 миллиондан зиёд хорижлик талаба ўқимоқда. Чет эллик талабалар сони бўйича Ҳиндистон (331,6 минг нафар ёки 29,4 фоиз), Хитой (277,3 минг нафар ёки 24,6 фоиз) ва Жанубий Корея (43,1 минг нафар ёки 3,8 фоиз) юқори ўринларни эгаллаган.

Қўшма Штатлар олий ўқув юртларида Ўзбекистон вакиллари йил сайин кўпайиб бораётганини кузатиш мумкин.

2021-2022 ўқув йилида 631 нафар ўзбекистонлик талаба АҚШ олий таълим муассасаларида таҳсил олган бўлса 2022-23 ўқув йилида улар сони 1089 нафарга етган.

Аввалроқ Германиядаги “Статиста” ташкилоти Ўзбекистон хорижда таълим олаётган талабалар сони бўйича дунёда бешинчи ўринга чиққанини маълум қилганди. Ташкилотга кўра, чет элда таҳсил олаётган ўзбекистонлик талабалар сони 110 мингдан ошади.

Ўзбекистон президенти Шавкат Мирзиёев 20 ноябрь куни парламентнинг қуйи палатаси йиғилишида ҳукумат раҳбари лавозимига Абдулла Арипов номзодини кўрсатган. Президент матбуот хизмати маълумотига кўра, Мирзиёев йиғилишда “Янги Ўзбекистон янги парламенти билан бирга ўз тараққиётининг ҳал қилувчи босқичига қадам қўяётгани”ни таъкидлар экан, “бу янги даврда кечаги талаб ва мезонлар билан, эскича ишлаб бўлмаслиги”ни қайд этган.

“Шу боис Ҳукумат ўз фаолиятини мутлақо янгича асосда ташкил этиши керак, бунинг учун унга кучли раҳбар, яъни Бош вазир зарур”, деган президент “бу масалани атрофлича ўйлаб, Ўзбекистон Республикаси Бош вазири лавозимига Абдулла Нигматович Арипов номзодини кўрсатишга қарор қилгани”ни айтган.

Мирзиёев фикрича, “Абдулла Арипов катта ташкилотчилик салоҳиятига эга бўлган, ижро ҳокимияти тизимида бой билим ва тажриба орттирган, масъулиятни доимо чуқур ҳис этадиган раҳбар”дир.

Ҳукумат раҳбари лавозимига кўрсатилган Абдулла Арипов номзодини кўриб чиққан Қонунчилик палатаси депутатлари яширин овоз бериш йўли билан уни бош вазир лавозимига маъқулладилар.

Абдулла Арипов 2016 йилдан буён Ўзбекистон бош вазири лавозимини эгаллаб келади. У 2002 йил майидан 2009 йил октябригача Ўзбекистон алоқа ва ахборотлаштириш агентлигининг раҳбари бўлиб, 2009 йилдан 2012 йилгача эса бош вазир ўринбосари бўлиб ишлаган.

Мулозим 2012 йили телекоммуникация соҳасидаги коррупция жанжали ортидан ишдан олинган эди. Шундан сўнг у бир неча йил давомида Тошкент алоқа коллежида оддий ўқитувчи бўлиб ишлаган.

Мирзиёев иқтидорга келганидан сўнг - 2016 йилнинг 13 сентябрида Абдулла Арипов аввал бош вазирининг ўринбосари, кейин эса бош вазир этиб тайинланганди.

Жиноят ишлари бўйича Наманган вилояти Тўрақўрғон тумани суди ўз қизини ўлдирган отани 10 йил муддатга озодликдан маҳрум қилиш ҳақида ҳукм чиқарган.

Kun.uz нашрининг суд ҳужжатларига таянган ҳолда ёзишича, мудҳиш жиноят 2024 йилнинг 12 июнь куни Тўрақўрғон тумани Исвахон маҳалласида содир этилган.

1974 йилда туғилган М. Э. шу куни соат 7:00 ларда ўз яшаш хонадонида 2002 йилда туғилган қизи Д. У.ни рўмол билан бўғиб ўлдирган. Бунга қизи унаштирилган йигитга турмушга чиқишни рад қилгани, бошқа йигит билан гаплашишини айтгани сабаб бўлган.

Суд ҳужжатлари қайд этилишича, бир неча дақиқа рўмол билан қизини бўғиб турган ота у ўлмаганини кўриб, қўллари билан бўғишни давом эттирган. Қизнинг жони узилгач, хотини ишдан келиб қўрқиб кетмаслиги учун фарзандининг мурдасини уй ертўласига олиб тушиб қўйган.

Сўнгра М. Э. ўз жонига қасд қилмоқчи бўлган. Аммо кейинроқ бу ниятидан қайтиб, ҳуқуқ-тартибот идораларига бориб, содир этган қилмишини бўйнига олган.

Судда М. Э. айбига иқрор бўлиб, қизини ўлдириб қўйганидан қаттиқ пушаймонлигини билдирган.

Марҳуманинг онаси Т. Э. суд муҳокамасида қотилликка қўл урган турмуш ўртоғини кечириши, лекин у қилмишига яраша жазо олиши кераклигини айтган.

Суд М.Э. Ўзбекистон Жиноят кодексининг 97-моддаси (қасддан одам ўлдириш) 1-қисмида назарда тутилган жиноятни содир қилганликда айбдор деб топган.

Оила бошлиғининг фарзандлари жонига қасд қилиши билан боғлиқ жиноятлар аввал ҳам содир этилган.

Озодлик, жумладан, 2020 йил июнь ойида Наманганнинг Янги Замин маҳалласида яшовчи 44 ёшли эр хотини ва вояга етмагани фарзандини болта билан чопиб ўлдиргани, 2017 йил декабрь ойида эса Андижоннинг Булоқбоши туманида 27 яшар эркак 8 ёшли қизини бўғиб ўлдиргани ҳақида хабар қилган эди.

Наманган вилоятининг Поп тумани ва Бухоро вилоятининг Когон шаҳрида ис газидан заҳарланиш ортидан ўлим ҳолатлари қайд этилди.

Бош прокуратура матбуот котиби Ҳаёт Шамсутдиновнинг Qalampir.uz нашрига маълум қилишича, 18 ноябрь куни соат 7:30 ларда Поп тумани Исковут маҳалласида яшаган 36 ёшли А.Б., унинг 14 ёшли ўғли ва 10 ёшли қизи яшаш хонадонида ис газидан заҳарланиб вафот этган.

Хонадон бекаси Г.М. ҳам ис газидан заҳарланиб, оғир ҳолатда туман тиббиёт бирлашмасига олиб келинган. Кўрсатилган тиббий ёрдам натижасида унинг ҳаёти сақлаб қолинган.

Маҳаллий матбуот хабарига кўра, 12 ноябрь куни соат 17:00 да Когон шаҳри Хива кўчасида жойлашган хонадонда ҳам 1987 йилда туғилган аёл ва унинг 12 яшар ўғли ҳам ис газидан заҳарланиш ортидан вафот этишган.

Ҳар икки ҳолат юзасидан прокуратура терговга қадар текширув олиб бораётгани айтилмоқда.

Совуқ кунлар тушиши билан мамлакат бўйлаб ис газидан заҳарланиш туфайли кўплаб ўлимлар қайд этилади. Жумладан, жорий йил 22 октябрь куни Жалақудуқ тумани Навоий МФЙда хонадоннинг тўрт аъзоси кўринмас офат сабаб ҳаётдан бевақт кўз юмганди.

Озодлик 18 октябрга ўтар кечаси Қорақалпоғистон пойтахти Нукус шаҳрида эр-хотин ва уларнинг уйига келган меҳмон йигит ҳам ис газидан заҳарланиш оқибатида вафот этгани ҳақида хабар берганди.

Фаоллар ис гази туфайли ўлимлар сони ортишига энергия тақчиллиги ҳам сабаб эканини айтиб келади.

Ўзбекистон Олий Мажлиси Сенати ўндан зиёд юқори мартабали мансабдорнинг ҳисоботини эшитиш ваколатига эга бўлса-да, амалда ҳисоботлар кўп ҳолларда чуқур таҳлилларсиз кўриб чиқилмоқда. Бу ҳақда президент Шавкат Мирзиёев янги чақириқ Олий Мажлис Сенатининг 19 ноябрдаги илк мажлисидаги нутқида тўхталган.

У юқори палата ўз фаолиятида тўлиқ ишга солиши мумкин бўлган имкониятларга эътибор қаратиб, жумладан қонун ижодкорлиги жараёнига маҳаллий кенгашларни кенг жалб этиш, ҳар бир қонун бўйича уларнинг фикрини олиш амалиётини йўлга қўйишни тавсия қилган.

Мирзиёев, шунингдек, камбағалликни қисқартириш ва аҳолини ижтимоий ҳимоя қилиш, коррупцияга қарши кураш борасидаги дастурларни тўлиқ рўёбга чиқаришда сенаторларнинг иштироки муҳимлигини урғулаган.

“Ўзингиз бир тасаввур қилинг – 37 миллионли халқдан фақатгина 65 нафар инсонга сенатор бўлишдек юксак шараф ва бахт насиб этди. Бу улкан ишонч ва масъулиятнинг қадрига етиш, уни ҳалол ва содиқ хизмат билан оқлаш барчамизнинг муқаддас бурчимиздир”, деган президент.

Янги таркибдаги юқори палатанинг илк мажлисида Сенат раҳбарияти сайланган. 2019-2024 йилларда Сенат раиси ўлароқ фаолият юритган Танзила Норбоева яна раҳбарлик курсисини сақлаб қолган.

Абдулла Арипов бошчилигидаги Ўзбекистон ҳукумати 19 ноябрь куни янги сайланган Олий Мажлис олдида ваколатларини зиммасидан соқит қилди, дея маълум қилди Бош вазир матбуот котиби Бекзод Ҳидоятов.

Жорий йилнинг 27 октябрь куни ўтказилган парламент сайлови натижаларига кўра Ўзбекистонда Олий Мажлис (парламент) палаталари янги таркибда шакллантирилди.

Конституциянинг 116-моддаси ва “Ўзбекистон Республикаси Вазирлар Маҳкамаси тўғрисида”ги қонуннинг 7-моддасига асосан ҳукумат парламент янгиланиши муносабати билан истеъфога чиқиши лозим.

Президент фармонига мувофиқ, парламент олдида ўз ваколатларини зиммасидан соқит қилган ҳукумат янги таркибдаги Вазирлар Маҳкамаси шакллантирилгунга қадар ўз фаолиятини давом эттириши белгиланган.

Ўтган сайловдан бошлаб амалга киритилган тартибга биноан, янги бош вазир номзоди Олий Мажлис Қонунчилик палатаси (илгари Сенат билан биргаликда) кўриб чиқиши ва тасдиқлаши учун президент томонидан барча сиёсий партиялар фракциялари (илгари сайловда энг кўп депутатлик ўринларини олган партия) билан маслаҳатлашганидан кейин бир ой муддат ичида киритилади.

Эслатиб ўтамиз, 2016 йилдан бери Ўзбекистон ҳукуматини бошқариб келаётган Абдулла Арипов Олий Мажлис палаталарининг 2020 йил 20 январь кунги илк қўшма мажлисида яна қайта бош вазирликка тасдиқланганди.

Тошкент шаҳрида катта миқдордаги электр энергиясидан ноқонуний фойдаланган МЧЖ аниқланди.

“Ўзэнергоинспекция” матбуот хизматининг маълум қилишича, Яшнобод туманида жойлашган “К.И.” МЧЖ масъуллари электр ҳисоблагичга ташқи таъсир кўрсатиб, электр энергиясидан ноқонуний фойдаланган.

Ушбу қоидабузарлик натижасида электр таъминоти корхонасига 7 миллиард 528 миллион сўмлик зарар етказилган.

Мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилган.

“Ўзэнергоинспекция” ўтган ҳафта Жиззах вилояти Шароф Рашидов туманидаги дарвоза ясаш цехи электр қурилмаларини тармоққа улаб, 1,1 миллиард сўмлик электр энергиясидан ноқонуний фойдалангани ҳақида маълумот ёйинлаганди.

Энергетика идоралари мамлакатнинг турли ҳудудларида энергия ресурсларидан ноқонуний фойдаланиш ҳолатлари ҳақида мунтазам ахборот бериб боради.

Тармоқ фаоллари эса соҳа масъулларига “балиқнинг боши”ни ҳам тозалаш, “катта ўғрилар”ни ҳам фош этиш кераклигини эслатиб келади.

2025 йили Ўзбекистонда ижтимоий нафақа олувчилар сони 2 миллион 752 минг нафар бўлиши тахмин қилинмоқда. Ҳозирда нафақа олувчилар 2 миллион 940 минг киши экани инобатга олинса, бу тоифа аҳоли 188 минг нафарга камайиши аёнлашади.

Daryo.uz нашрининг Иқтисодиёт ва молия вазирлиги эълон қилган статистикага таянган ҳолда ёзишича, мамлакатда нафақа олувчи болали ва кам таъминланган оилалар сони ҳамда уларга ажратиладиган маблағ миқдори йил сайин қисқартириляпти.

2024 йилда болали ва кам таъминланган 1 миллион 359 мингта оилага жами 8,1 триллион сўм нафақа тўланаётган бўлса, келгуси йил бундай оилалар сони 1 миллион 247 мингта қолиши ва уларга 7,4 триллион сўм тўланиши режалаштирилмоқда.

2023 йилда эса 2,2 миллион оилага жами 12,3 триллион сўм болалар нафақаси ва моддий ёрдам пули тўланган. Оилаларнинг 2,13 миллионтаси болалар нафақаси, қолган 76 мингтаси моддий ёрдам олган. Шу тариқа ўтган бир йил давомида нафақа олувчи оилалар сони қарийб бир миллионтага қисқартирилган.

2025 йилда республика бюджетидан ижтимоий ҳимоя учун 17,3 триллион сўм ажратилиши белгиланган.

Россияда 19 ноябрь куни бошланадиган “Ўзбекистон маданияти кунлари” тадбири олдидан икки давлат ўзаро орден алмашди.

Россия президенти Владимир Путин 18 ноябрь куни Ўзбекистон халқ артистлари Фаррух Зокиров ва Севара Назархонни “ўзбек ва рус маданиятини яқинлаштириш ҳамда бойитишга қўшган ҳиссаси учун” “Дўстлик” ордени билан мукофотлади.

Ўзбекистон президенти Шавкат Мирзиёев ҳам россиялик икки санъаткорни мукофотлашга қарор қилган.

Президент матбуот хизмати ёйинлаган фармонга мувофиқ, Сергей Безруков (РФ халқ артисти, Москва драма театри бадиий раҳбари, театр ва кино актёри) ҳамда Андрис Лиепа (РФ халқ артисти, балет артисти, режиссёр) “ёрқин ва бетакрор истеъдоди, хусусан, кино ва театр йўналишидаги сермаҳсул ижодий фаолияти билан маданият ва санъат соҳаларида ҳамкорликни кенгайтириш, маънавий қадриятларни асраб-авайлаш ва бойитишга қўшаётган муносиб ҳиссаси учун” Ўзбекистон Республикасининг “Дўстлик” орденига муносиб кўрилган.

Бугун Москвадаги Кремль давлат саройида “Ўзбекистон маданияти кунлари” доирасида ўзбек санъати усталари иштирокида концерт дастури намойиш этилади.

Тошкент шаҳри Яккасарой туманидаги “Аския” деҳқон бозори қайта қурилади, дея маълум қилди туман ҳокимлиги матбуот хизмати.

Қайд этилишича, бир неча инвестор томонидан бозорни қайта қуриш бўйича таклиф билдирилган.

Туман ҳокими Нилуфар Аллабергеновага кўра, сотиб олиш таклифи билан чиққан инвестор “Аския” бозорининг бошқарувчиси бўлган жамиятга 3000 кв метр майдонда экобозор, 1200 кв метр майдонда совиткич омборхона ва 400 ўринга мўлжалланган ерости автотураргоҳни беғараз ўтказиб бериши керак.

Лойиҳага 150 миллион доллар миқдорида тўғридан-тўғри хорижий инвестиция жалб этилиши ва янги бозор ёнида жаҳон стандартларига жавоб берадиган 4 юлдузли меҳмонхона барпо этилиши кўзда тутилган.

Ҳокимлик қайта қуриш лойиҳасини “бозорда харидорларнинг келиб кетишига бир қатор ноқулайликлар мавжудлиги” билан асослаган.

Расмий маълумотда 150 миллион доллар сармоя киритмоқчи бўлган инвестор номи очиқланмаган.

Пойтахтнинг энг қиммат мавзеларидан бирида жойлашган “Аския” бозорининг камтарона миқдордаги сармоя эвазига бериб юборилиши экспертлар томонидан “коррупциоген амалиёт” деб танқид қилинди.

“Таклиф этилаётган схемадан на давлат бюджети, на маҳаллий бюджет бир сўм ҳам олмайди... Энг ликвид, энг қиммат локацияларни “инвестиция киритиш” шаблони билан совға қилишни ва чўнтаклар фойдасига тақсимлашни бутунлай тўхтатиш керак”, деб ёзди иқтисодий таҳлилчи Отабек Бакиров.

Фаоллар фикрича, бозор очиқ аукционга қўйилиши ва истаган талабгор минимал шартлар билан савдога киритилиши керак.

Ўзбекистон президенти Шавкат Мирзиёев 18 ноябрь куни Олий Мажлис Қонунчилик палатасининг 5-чақириқдаги илк ялпи мажлисида нутқ сўзлади. Президент матбуот хизмати қайдича, Мирзиёев ўз чиқишида парламентда мухолифатни жонлантириш зарурлигини айтган.

Бунинг учун эса қонунчилик идорасида мухолифатга кафолатланган ҳуқуқлари сонини 3 тадан 6 тага ошириш, 1 нафар қўмита раиси ва 2 нафар қўмита раиси ўринбосари лавозимларини кафолатли эгаллаш, ҳар чоракда “Ҳукумат соати” ва парламент сўрови доирасида камида биттадан масала киритиш каби қўшимча ҳуқуқлар беришни таклиф қилган.

Шунингдек, у янги даврда парламент чинакам халқ уйи, унинг қуйи палатаси эса ғоялар генераторига, соғлом рақобат, баҳс ва мунозаралар майдонига айланиши кераклигини урғулаган.

Мирзиёевга кўра, ҳозирча парламент назорати тўлақонли таъсирчан институтга айланди, деб айтиб бўлмайди. Парламент ва депутатлик назорати ижтимоий соҳа билан чекланиб қолмоқда.

Нутқ давомида Қонунчилик палатасига ҳукумат аъзоси ҳисоботини эшитиб, унинг якунларига кўра ушбу раҳбарни истеъфога чиқариш тўғрисида президентга таклиф киритиш ҳуқуқи берилгани эслатилган.

Йиғилишда ташкилий масалалар ҳам кўрилган.

Сиёсий партиялар вакиллари кенгашининг таклифига биноан, депутатлар яширин овоз бериш йўли билан ЎзХДП вакили Нуриддин Исмоиловни навбатдаги муддатга Қонунчилик палатасининг спикери этиб сайлаган.

Озодлик аввалроқ хабар берганидек, ЕХҲТ Ўзбекистонда 27 октябрь куни бўлиб ўтган парламент сайловига доир дастлабки баёнотида сиёсий муҳит чекланган ҳолда қолгани ва сайловчиларга ҳақиқий танлов имконияти берилмаганига эътибор қаратганди.

“Рўйхатдан ўтган беш партия ҳукумат сиёсатини умумий қўллаб-қувватлагани сабабли сайловчиларга ҳақиқий муқобил вариантлар тақдим этилмади. Бу фуқаролар овозини чинакам ифодалаш учун янада фаол ва рақобатбардош сиёсий муҳитни яратиш зарурлигини яна бир бор таъкидлайди”, деган эди ЕХҲТ Парламент Ассамблеяси делегацияси раҳбари Саргис Ханданян.

Ўзбекистонда ҳарорат -10, -20 даражагача пасайган тақдирда ҳам аҳоли ва иқтисодиётни энергия билан таъминлаш бўйича ҳаракатлар режаси ҳозирланган, деб маълум қилди энергетика вазири Жўрабек Мирзамаҳмудов.

“Ўзбекистон 24” телеканалига берган интервьюсида мулозим мамлакат президенти мутасаддиларга чекловларсиз, узлуксиз электр таъминотини таъминлаш бўйича топшириқ берганини урғулаган.

“2024 йилнинг ноябрь ойи ўтган ноябрга нисбатан салқинроқ бўлиб, қор ёғиб, ҳарорат -3 даражагача, айрим ҳудудларда -8 даражагача пасайган. Бу табиий газ ва электр энергияси истеъмолини кескин оширди. Ушбу [истеъмол] режимларини таъминлаш учун зарур захира ресурслари жалб қилинди. Газ омборларида етарли ҳажмда газ тўпланиши ҳисобига газ билан таъминланди. Аҳоли учун ҳам, иқтисодиёт тармоқлари учун ҳам узлуксиз етказиб бериш таъминланди”, деган Мирзамаҳмудов.

Энергетика вазири ҳудудларда ҳам электр энергияси, ҳам газ таъминотида узилишлар бўлаётгани ҳақидаги мурожаатларга муносабат билдирмаган.

Унга кўра, куз-қиш мавсумида истеъмолчиларга 21 миллиард куб метр газ етказиб бериш режалаштирилган. Кескин совиш ҳолатида ҳаракат режаси ва ижтимоий муассасаларни узлуксиз энергия билан таъминлаш чоралари ишлаб чиқилган.

“Бу масалалар бўйича ҳам масъулият, ҳам мажбуриятлар белгиланган”, дея ишонтирган Жўрабек Мирзамаҳмудов.

Энергетика вазири аввалроқ “Газли” ва “Хўжаобод” ерости газ омборларида қиш мавсуми учун 5,1 миллиард куб метрдан ортиқ газ жамлангани, захира ўтган йилга нисбатан 1,1 миллиард куб метрга кўп эканини маълум қилганди.

Қиш мавсумида электр энергияси ва газ узилиши одатий ҳолга айланган шароитда аҳоли энергетика раҳбариятининг “узлуксиз таъминот” ҳақидаги ваъдаларига шубҳа билан қарайди.