Ўзбекистонда ихтиёрий равишда ҚҚС тўловчиси сифатида рўйхатдан ўтган хорижий ширкатлар қаторига “Яндекс” ҳам қўшилди.
Давлат солиқ қўмитасига қарашли tax.uz сайти қайдига кўра, Швейцарияда рўйхатга олинган Yandex Europe AG 28 май куни рўйхатдан ўтган. Европа бозорида ишлаш учун йўналган бу шўъба ширкатини “Яндекс” 2012 йилда тузган.
Аввалроқ Google, Facebook, Apple, Netflix, Samsung, Booking.com каби йирик ширкатлар Ўзбекистонда ҚҚС тўловчиси сифатида рўйхатга олинганди.
Ўзбекистонда 2020 йил бошидан жисмоний шахсларга хизматларни электрон шаклда тақдим этадиган хориж компаниялари учун қўшилган қиймат солиғи тўлаш тартиби жорий этилганди.
Бу каби ширкатларни рўйхатга олиш учун ДСҚ томонидан махсус хизмат – Интернет-компанияларнинг ҚҚС-офиси – tax.uz сайти яратилган.