Ўзбекистон Президенти Шавкат Мирзиёев президентлик муддатини 5 йилдан 7 йилга узайтирган конституциявий ўзгаришлар ортидан навбатдан ташқари президентлик сайлови ўтказилишини эълон қилди.

Сайлов 9 июль куни бўлади.

Мирзиёев бу ҳақда эълон қилар экан, президентлик муддатининг қолган уч ярим йиллик муддатидан “ўз ташаббуси билан” воз кечаётганини айтди.

Навбатдан ташқари парламент сайловлари учун ҳам уч ойлик муддат берилган, бироқ амалдаги икки палатали органни тарқатиб юбориш тўғрисида қарор қабул қилинмаган.

30 апрель куни бўлиб ўтган конституцияга ўзгартиришлар бўйича референдум президентлик муддатини узайтиришга йўл очди. Кузатувчилар ташаббуснинг асосий мақсади Мирзиёевнинг президентлик муддатини узайтириш эканини таъкидламоқда.

66 ёшли Мирзиёев 2021-йилда иккинчи беш йиллик президентлик муддатига сайланган. Муддатидан ташқари президентлик сайловларида ғалаба қозониши унга қўшимча 14 йиллик ваколат бериши мумкин,.

Мирзиёев илк бор 2016 йилда узоқ йиллик раҳбар Ислом Каримовдан кейин президентликка сайланган эди.

Каримов конституцияга кўра икки муддат президентликка рухсат берилганига қарамай, тўрт марта президент этиб сайланган ва референдум орқали бир марта президентлик муддатини узайтирган. Унинг президентлиги даврида президентлик муддати беш йилдан етти йилга, кейин яна етти йилдан беш йилгача ўзгартирилди.

Каримов 2016 йилда 78 ёшида вафот этгунига қадар Ўзбекистонни 27 йил бошқарди.