ЦАХАЛнинг Ғазо бўлгасидаги ерусти амалиёти об-ҳаво туфайли кечиктирилиши мумкин
Исроилда тўққиз кундан бери уруш давом этмоқда. У еттинчи октябр тонггида Ғазо бўлгасидан террорчиларнинг ялпи ракета зарбалари, ҲАМАС ва “Ислом жиҳоди” гуруҳлари жангариларининг Исроил ҳудудига кириб, камида 120 кишини гаровга олиши билан бошланган эди.
Сўнгги қайдларга кўра, ҳужум натижасида 1300 дан зиёд исроиллик ҳалок бўлган, 3400 нафарга яқин киши яраланган. Исроил жавобан Ғазо бўлгасига бир неча кундан буён кетма-кет авиазарбалар бермоқда.
Бироқ ЦАХАЛнинг шу дам олиш кунлари бошланиши режаланган ерусти амалиёти айрим сабаблар, жумладан об-ҳаво шароити туфайли бир неча кунга кечиктирилди.
Бу ҳақда, Исроил мудофаа армиясидаги юқори мартабали манбаларига таяниб The New York Times газетаси хабар қилмоқда.
Манбаларга кўра, ерусти амалиёти қолдирилишига Исроил учувчилари ҳамда дронлар операторлари имкониятларини чеклаб қўйиши мумкин бўлган булутли об-ҳаво “қисман сабаб бўлган”.
Мазкур амалиётга қуруқлик қўшинларининг ўн минглаб аскари, шунингдек танклар, сапёрлар ва махсус кучлар, авиация ва артиллерия жалб қилиниши кутиляпти.
14 октябр оқшомида ЦАХАЛ матбуот хизмати Исроил армияси ерусти амалиётига шайлигини маълум қилган эди. Бундан олдин ҳарбийлар Ғазо тинч аҳолисини бўлгадан жанубга кўчиб кетишга чақиришган эди, ҲАМАС эса одамларни Исроилнинг чақириғига қулоқ солмасликка даъват қилмоқда.
Исроил армияси 15 октябрга ўтар кечаси Ғазо бўлгасига йўлланган авиазарбалар натижасида ҲАМАСнинг “Нуҳба” жангарилар ротаси командири Билол Ал-Кедра ўлдирилганини билдирди.
Исроил ҳарбийлари чегара яқинидаги Нирим Кибуцида юз берган хунрезликлар “Нуҳба” командири буйруғига кўра амалга оширилган, деб ҳисоблашади. Тунги авиазарбаларда ҲАМАС ва “Ислом жиҳоди”нинг бошқа жангарилари ҳам йўқ қилинди, дейилади ЦАХАЛ хабарномасида.
Кеча оқшом чоғи ва кечаси ЦАХАЛ Ғазо бўлгасидаги юздан ортиқ ҳарбий объектларга зарбалар берди.
Хусусан, ҲАМАС қўмондонлик марказлари, ҳарбий комплекслар, ракета отиш қурилмалари ва кузатув масканлари нишонга олинди.
Шунингдек, “Ислом жиҳоди”нинг қўмондонлик марказлари ҳам ўққа тутилди, дея маълум қилди Исроил Мудофаа армияси.
Аввалроқ New York Times Исроил ҳарбийларига ҳавола берган ҳолда, мамлакат Ғазо шаҳрини босиб олиш ва бўлга раҳбариятини “йўқ қилиш” учун 10 минг аскар жўнатишни режалаётгани ҳақида хабар қилган эди.
Ҳисоботларда бу 2006 йилги Иккинчи Ливан урушидан бери энг йирик ҳужум бўлиши, ЦАХАЛ Ғазо бўлгасининг бир қисмини лоақал вақтинча ўз қўлида тутиб туришга ҳаракат қилиши айтилади.
Бироқ кейинроқ хабар қилинишича, Исроил об-ҳаво туфайли ерусти амалиётини кечиктириши мумкин.
Исроил Ғазога денгиздан ҳужум қилди
Кеча Исроил Ғазога ҳам ҳаводан, ҳам денгиздан ҳужумга ўтганини маълум қилди. Исроил кучлари кутилаётган қуруқликдаги ҳужум олдидан Ғазо билан чегарага танкларни ҳам жойлаштирган.
Исроил Мудофаа Кучлари «Ҳамас ҳарбий объектини биринчи марта "Саар 6" типидаги ракетадан нишонга олгани ва Ўртаер денгизидан Ғазодаги нишонларга зарба берилгани акс этган видеони эълон қилди.
Ҳамаснинг Исроилга 7 октабрдаги қонли ҳужумидан сўнг, Исроил Ғазони реактив самолётлар ва артиллериядан бомбардимон қилмоқда. Исроилнинг тинимсиз ҳужумлари 2,3 миллион фаластинлик яшайдиган анклав ҳудудни қамал ичида қолдирди.
Ғазо секторидаги уйга бомба тушиб портлаши оқибатида 20 киши ҳалок бўлди
Шанба куни маҳаллий вақт билан 16:00 атрофида) Ғазо сектори марказидаги Дайр ал-Балаҳ шаҳрида уй бомбардимон қилинди.
Бу уйда Ал-Ажрамийлар оиласи ва уларнинг Ғазо шаҳридаги уйларидан кўчирилган қариндошларининг яна 10 оиласи яшаб турган эди.
Фаластин Соғлиқни сақлаш вазирлиги, портлаш оқибатида ўнлаб жароҳатлардан ташқари, аксарияти болалар дохил 20 киши ҳалок бўлганини эълон қилди.
Портлашдан омон қолганларнинг сўзларига кўра, нишонга олиш ҳеч қандай огоҳлантиришсиз амалга оширилган.
Тўрт ёшли Фулла Ал-Лаҳам Хон Юнис касалхонасида ёлғиз уйғонди. Исроил ҳаво ҳужуми натижасида вайрон бўлган уйдан биргина ал Лаҳам омон олиб чиқилди. Оиланинг қолган 14 аъзоси ҳалок бўлди.
Ғазо соғлиқни сақлаш расмийлари Исроил ҳужумларида 2300 дан ортиқ одам ўлгани, 10 мингга яқин инсон эса яралангани, уларнинг тўртдан бири болалар эканини билдирди.
Ал Лаҳамнинг бувиси Ум Муҳаммад набираси тирик қолганини кўриб бироз бўлсада кўнгли ёришди.
«Ўғилларим, набираларим ва ўғлимнинг қайнонаси уйда ўтиришган бўлган. Тўсатдан уйни бомбардимон қилишган. 14 киши ҳалок бўлди. Фақат шу қиз, набирам Фулла омон қолди. Умид қиламанки, у тузалиб кетади. Ўлганларнинг руҳлари ором топсин. Худо одамларга сабр-тоқат бергувчи зот», дейди Ал Лаҳамнинг бувиси.
Ғазо касалхоналари ярадорлар билан тўлиб тошди
Исроил ва Ҳамас ўртасидаги тўқнашувда яраланган фаластинликларнинг Ғазодаги шифохоналарга оқими давом этмоқда.
Ярадорлар сони ортиб бораётгани сабабли, Жаҳон соғлиқни сақлаш ташкилоти Ғазо секторига зудлик билан инсонпарварлик ёрдамини етказишга чақириб, Ғазо соғлиқни сақлаш тизими издан чиқиш ёқасида эканидан огоҳлантирди.
Тинимсиз бомбардимонлар Дайр ал-Балаҳдаги ал-Ақсо шаҳидлари касалхонаси сингари шифохоналарни оғир аҳволга солиб, тинч аҳоли ва тиббиёт ходимларининг ҳаётига хавф солмоқда.
Ғазодаги касалхонада аянчли манзара. Баъзилар замбилда ётган ҳолда олиб келинган. Яна бошқалар эса қўлларида қонга беланган гўдакларини кўтариб турибди. Йўлакларда ярадор болалар йиғлайди.
"Касалхонага олиб келинган ярадорлар қирғин қилинди. Ўнлаб оилалар қирғин қилинди. Олиб келинган ярадорлар касалхона сиғимидан ортиб кетди. Бу бизнинг имкониятларимиздан ташқари. Беморларни коридор ва қаватларда даволашни бошладик. Бу жуда хавфли", дейди шифокор Халил Алдагран.
Ғазо шимолидаги Камол Эдван шифохонаси шифокорларига эвакуация қилиш буюрилган, бироқ янги туғилган чақалоқларнинг ҳаётини сақлаб қолишга ҳаракат қилаётган шифокорлар бундан бош тортмоқда.
Шифокор Ҳуссам Абу Сафиянинг айтишича, болаларни эвакуация қилиш "уларга ўлим жазосини бериш" дегани, кўп бола турли касалликларни даволовчи вентилятор ва инкубаторларга уланган:
“Ушбу палатада олтита каравот бор ва кўриб турганингиздек, барча тўшаклар тўла. Изоляция хонасидан ташқари, бандлик даражаси 100 фоиз атрофида. Кўриб турганингиздек, барча ҳолатлар фарқ қилади. Исроил буни хоҳлайдими? Бу болалар қаерга олиб кетилади? Бу уларнинг айби эмас. Болалар шифохонасида муҳим палаталар, жумладан, Ғазо шимолидаги ягона реанимация бўлими мавжуд. Кўриб турганингиздек, бу палатада сунъий нафас аппаратига уланган болалар бор, энди биздан касалхонани эвакуация қилишни сўрашди, бу болаларни қаерга эвакуация қилишимиз керак. Бу болалар аппаратга уланган ва уларни кўчириш мумкин эмас. Бу болаларни кўчириш улар учун катта хавф туғдиради”.
Фаластин Соғлиқни сақлаш вазирлиги кечаги ҳисоботида бир кун ичида Исроил ҳаво ҳужумларида камида 400 киши ҳалок бўлгани ва 1500 дан ортиқ одам жароҳатланганини маълум қилди.
Расмий статистик маълумотларга кўра, можарода 28 нафар фаластинлик тиббиёт ходими қурбон бўлган.
Вазирлик маълумотларига кўра, Ғазода ҳозирга қадар 2215 киши ҳалок бўлган, 8714 киши жароҳатланган.