Мирзиеёв Трампга табрик мактуби йўллади
Ўзбекистон президенти Шавкат Мирзиёев Дональд Трампни АҚШдаги президент сайловида ғалаба қозонгани муносабати билан табриклади. Мирзиёевнинг табрикномаси матни президент матбуот хизмати томонидан ёйинланди.
“Сайловлардаги ишончли ғалабангиз Сиздек бой тажрибали ва моҳир сиёсатчининг АҚШни халқаро майдондаги нуфузи ва иқтисодий қудратини ошириш, глобал тараққиёт ва фаровонликни таъминлашга қаратилган дастур ва режаларингиз Америка халқи томонидан фаол қўллаб-қувватланганини яна бир бор яққол тасдиқлади”, деган Мирзиёев ўз табригида ўзбекистонликлар АҚШнинг Ўзбекистон мустақиллиги, суверенитети ва ҳудудий яхлитлигини қўллаб-қувватлашга қаратилган ўзгармас позициясини, мамлакатда “ортга қайтмас тус олган туб ислоҳотларга кўрсатиб келаётган доимий кўмаги”ни алоҳида қадрлашини урғулаган.
Ўзбекистон президенти Трампнинг илк президентлик даврида (2018 йил майида) Оқ уйда икки президент ўртасида ўтказилган “сермаҳсул музокаралар”дан кейин Ўзбекистон ва АҚШ ўртасидаги стратегик шерикликнинг янги даври бошланганини эслатган.
“Сизнинг шахсий эътиборингиз билан мамлакатларимиз ўртасидаги муносабатлар мисли кўрилмаган даражада ривожланиб, ўзаро ишонч, ҳурмат ва бир-бирини қўллаб-қувватлашга асосланган сиёсий мулоқотларимиз янада мустаҳкамланди, савдо-иқтисодий, хавфсизлик, ҳарбий-техникавий ва гуманитар алоқалар жадаллашди. Юқори даражадаги вакилларимиз ва қонун чиқарувчилар ўртасидаги фаол ташрифлар алмашувлари натижасида ҳамкорлигимиз сифат ва мазмун жиҳатидан юксак босқичга кўтарилди”, деган Мирзиёев расмий Тошкент бундан буён ҳам Трамп бошчилигидаги АҚШ маъмурияти билан “дўстона алоқаларни изчил давом эттиришдан, олий ва юқори даражада эришилган барча келишувларни тўлиқ амалга оширишдан манфаатдор” эканини қайд этган.
Мирзиёев ўз табригида Ўзбекистон томони “С5+1” платформаси ва “Марказий Осиё давлатлари билан АҚШ ўртасида савдо ва инвестициялар бўйича ҳадли Битими” доирасида минтақавий ҳамкорликни янада кенгайтириш тарафдори эканини таъкидлаган.
Икки мамлакат ўртасида сиёсий-дипломатик, савдо-иқтисодий, хавфсизлик, банк-молия, энергетика, транспорт, қишлоқ хўжалиги, рақамлаштириш, инновация, таълим ва бошқа соҳалардаги шериклик ривожланиб бораверишига умид билдирган Мирзиёев келгусида Афғонистонда барқарор тинчликни таъминлаш ва унинг иқтисодий-ижтимоий тараққиётига ҳисса қўшиш АҚШ ва Ўзбекистон ҳамкорлигининг ажралмас қисмига айланишига ишонишини қўшимча қилган.