Кремль: Мирзиëев Путин билан суҳбатда "тушуниш" изҳор қилди
"Ўзбекистон президенти Шавкат Мирзиëев Россиянинг Украинадаги махсус ҳарбий операцияларини тушуниш билан қабул қилишини билдирди"¸ деб хабар қилди Кремль матбуот хизматига таяниб Россия ахборот агентликлари.
Ўзбекистон президенти матбуот хизмати 25 февраль куни Шавкат Мирзиёев Россия Президенти Владимир Путин билан телефон орқали мулоқот қилганини маълум қилди.
Ўзбек томони расмий хабарига кўра¸ Мирзиëев ва Путин халқаро мавзулар доирасида "Украина атрофида юзага келган вазият юзасидан ҳам фикр алмашган".
Россия ҳарбийлари Украина пойтахти Киевни ишғол қилишга уринаëтган бир пайтда бўлиб ўтган Путин-Мирзиëев телефон мулоқотининг қайси томон ташаббуси билан бўлгани ҳозирча айтилмади.
Айни шу куни Россия Бош вазири Қозоғистон президенти¸ Россия Федерация кенгаши раиси Валентина Матвиенко Тожикистон президенти билан суҳбатлашди.
Кремль тарқатган хабарга кўра¸ Ўзбекистон¸ Қозоғистон ва Тожикистон раҳбарлари Россия билан ўзаро ҳамкорлик истиқболларини муҳокама қилган.
24 февраль куни АҚШ¸ Буюк Британия¸ Европа Иттифоқи ва Канада каби давлатлар Украинага уруш бошлаган Россияга қарши кескин иқтисодий санкция жорий қилди.
Литва Россия телеканаллари намойишини тақиқлади
Литва ҳукумати Россия ва Беларуснинг рус тилидаги олтита телеканали кўрсатувларини ретрансляция қилишни тақиқлади.
25 февралдан бошлаб "РТР Планета", "Россия 24", "Беларусь 24", "НТВ Мир" кўрсатувларини намойиш қилиш 5 йилга¸ "РБК" и "TVCI" ретрансляцияси эса¸ уч йилга тақиқланди.
Айни шу куни Эстония истеъмолчилар ҳақлари ҳимояси ва техник назорат департаменти ҳам қатор Россия ва Беларус телеканаллари трансляцияси тўхтатилганини эълон қилди.
Департамент ўз қарорини бу телеканалларнинг "тақиқланган маълумотни тарқатиш билан шуғулланаëтгани" билан изоҳлади.
Эстонияда тақиқланган телеканаллар рўйхатида "РТР Планета", "НТВ Мир", "НТВ Мир Балтик", "Беларусь 24", "Россия 24" (ВГТРК) ва "ТВ Центр International" (TVCI).
Киев ҳаводан бомбардимон қилинмоқда
25 февраль куни Украина пойтахти Киев Россия ҳарбий кучларининг ракета-бомба ҳужумларига нишон бўлмоқда.
Киевликлар олган видеотасвирларда осмоннинг ракеталар зарбидан ëришгани ва портлаш зарбидан уй-жойларнинг ларзага келгани кўрилади.
Украина Ички ишлар вазирлиги Киев устида Россия ҳарбий қурилмаси уриб туширилганини билдирди¸ аммо унинг учқич ëки ракета эканини аниқлаштирмади.
Видеолардан уриб туширилган қурилма қолдиқларининг кўп қаватли уйга келиб тушгани ортидан ëнғин бошлангани ва уйга жиддий зиëн етгани кўрилади.
ЕИ Ташқи ишлар вазирлари фавқулодда мажлис ўтказмоқда
25 февраль куни Европа Иттифоқига аъзо 27 давлат Ташқи ишлар вазирлари фавқулодда мажлисга тўпланди.
Кун тартибидаги асосий масала - Россиянинг Украинага бошлаган тўлақонли уруши ортидан юзага келган жорий вазият.
Европа дипломатлари Украинага яна қандай ëрдам бериш мумкинлиги ва ҳарбий амалиëтларни тўхтатмаëтган Россияга нисбатан қандай ëндашишни муҳокама қилмоқда.
24 февраль куни ЕИ Россия молия¸ энергетика¸ транспорт ва экспорт соҳасини нишонга олувчи санкциялар пакетини эълон қилди.
Иттифоқ раҳбарлари бу санкцияларнинг мисли кўрилмаган даражада кенг кўламли экани ва ЕИ аъзоларининг Украинани қўллаб-қувватлаш масаласида якдиллигини кўрсатишини таъкидламоқда.
Аммо Украина президенти Владимир Зеленский бу санкциялар Кремлни урушни тўхтатишга мажбурлаш учун етарли эмаслигини айтиб¸ ЕИ ҳукуматларини кучлироқ чора қўллашга чақирмоқда.