Қирғизистонда машҳур бўлган жарроҳ олим Эрнст Акрамов 26 ноябрь куни 88 ёшида Бишкекда оламдан ўтди. Бу ҳақда Озодликнинг қирғиз хизмати Қирғизистон Соғлиқни сақлаш вазирлигидан олинган маълумотга таянган ҳолда хабар қилди.

Таниқли жарроҳ 27 ноябрь куни Бишкекдаги Алаарча қабристонига дафн этилган. У билан хайрлашув маросими Абдилас Малдибаев номидаги Қирғизистон Миллий академик опера ва балет театрида бўлиб ўтган. Акрамовнинг жанозасида ҳукумат вакиллари, парламент депутатлари, маҳрумнинг ҳамкасблари ва яқинлари иштирок этишган.

Ўзбек миллатига мансуб бўлган Эрнст Акрамов 1936 йил 24 июнида Фрунзе шаҳрида туғилган. У 1960 йилда Қирғизистон давлат тиббиёт институтини тамомлаган. Акрамов мамлакатда таниқли профессор, тиббиёт фанлари доктори ва жарроҳ эди. Ўз фаолияти давомида у СССР халқ депутати этиб сайланган, 2008 йили эса Қирғизистонда фан ва техника соҳасида давлат мукофотига сазовор бўлган. Қирғизистонда хизмат кўрсатган врач мақомига эга Акрамовга 2009 йилда “Қирғизистон қаҳрамони” унвони берилган.

Эрнст Акрамов 1992 йилдан бери Чуй вилояти бирлашган касалхонаси умумий жарроҳлик бўлимини бошқариб келган, 2002 йилда эса шу клиника қошидаги Реконструктив-тикловчи жарроҳлик илмий марказига раҳбари этиб тайинланган. Юзлаб илмий иш ва монографиялар муаллифи бўлган Акрамов мамлакат жамоатчилиги орасида меценат ўлароқ ҳам танилган эди.

TikTok бош директори Руминиядаги президент сайловида платформа ролига оид саволларга жавоб бериши учун Европарламентга чақирилди. У ерда сайловнинг биринчи босқичида машҳур тиктокер ва ультраўнг қарашдаги сиёсатчи Кэлин Жоржеску ғалаба қозонган.

Тадқиқотчилар овоз бериш куни арафасида минглаб фейк аккаунтда яширин фаоллик кузатилганини айтишмоқда, дея хабар қилди Politico нашри. Президент сайловида номзод ўлароқ иштирок этган ва иккинчи босқичга ўтолмаган Руминия бош вазири Марчел Чолаку Жоржеску кампаниясининг TikTok томонидан молиялаштириб-молиялаштирилмаганини текшириш зарурлигини билдирди.

Politico қайдича, Жоржескуга партия дастаги берилган эмас ва сўровлар ҳам унинг сайловчилар орасида рейтинги баландлигини кўрсатмаган – эндиликда тадқиқотчилар бутун диққат-эътиборларини унинг сайлов арафасида TikTok платформасида олиб борган йирик кампаниясига қаратишган. Тадқиқотчилар иддаосича, TikTok “минглаган фейк аккаунтлар оқими”ни кўрган бўлиши лозим.

“Биз TikTok бош директорини чиқиш қилишга ва унинг платформаси Рақамли хизматлар тўғрисидаги қонунни бузмаётганига кафолат беришга чақирамиз”, дея билдирган Европарламент депутати Валери Хайер.

TikTok Руминия сайловидаги ўзининг муҳтамал роли ҳақида изоҳ беришдан бош тортган.

Хитойнинг ByteDance ширкатига қарашли TikTok платформаси Европа Иттифоқида илк бор танқидга нишон бўлаётгани йўқ. 2023 йили Франция президенти Эммануэль Макрон TikTok’ни “айбсиздай кўрина оладиган” ва фойдаланувчилар орасида “ҳақиқий қарамлик”ка сабаб бўлаётган платформа деб атаган эди. Европа Иттифоқи платформага ҳали бирор марта йирик миқдорда жарима солмаган ёки санкция ҳам жорий қилган эмас.

Исроил Вазирлар маҳкамаси Ливандаги оташкесимга оид келишувни маъқуллади: келишувни 10 киши ёқлаган, бир киши эса бунга қарши овоз берган. Reuters агентлигининг ёзишича, АҚШ Ливанни мазкур келишув 27 ноябрь куни маҳаллий вақт билан тонгги соат 4 дан бошлаб кучга кириши ҳақида хабардор қилган.

“Исроил АҚШнинг бу жараёнга қўшган ҳиссасини қадрлайди ва ўз хавфсизлигига нисбатан ҳар қандай таҳдидга қарши ҳаракат қилиш ҳуқуқини ўзида сақлаб қолади”, дея билдирган Исроил бош вазири Бинямин Нетаняҳу.

АҚШ президенти Жо Байден ўз чиқишида Исроил ва Ливан бош вазирлари билан телефон орқали музокара олиб борганини, уларнинг ҳар бири ўз ҳукуматлари битимни қабул қилганини айтганини маълум қилди.

“Эндиликда ҲАМАС ҳам танлов қилиши керак. Улар учун ягона йўл – ўзлари тутиб турган америкалик фуқаролар дохил гаровдаги шахсларни озод қилиш. Бу жараён мобайнида жанговар ҳаракатларга якун ясалиши зарур, бу эса гуманитар ёрдам кўпайтирилиши учун имкон яратади. Яқин кунлар ичида Қўшма Штатлар Туркия, Миср, Қатар, Исроил ва бошқа мамлакатлар билан биргаликда Ғазо секторида ўт очиш тўхтатилишига эришиш учун яна бир уринишни амалга оширади”, деган Байден.

“Ҳизбуллоҳ” билан оташкесим келишувига қарши овоз берган ягона вазир Исроил миллий хавфсизлик вазири Итамар Бен-Гвир бўлган. Аввалроқ у мазкур келишувни “тарихий хато” деб атаб, унга қарши чиқишини билдирган эди.

“Бу сулҳ эмас. Бу “сукунат эвазига сукунат” концепциясига қайтишдир ва биз бунинг нималарга олиб келишини аввал ҳам кўрганмиз”, деб ёзган Бен-Гвир Х ижтимоий тармоғида.

Бинямин Нетаняҳу ўзининг сешанба кунги чиқишида Ливандаги “Ҳизбуллоҳ” радикал гуруҳининг қайта қуролланиш бўйича ҳар қандай уриниши келишув шартларининг бузилиши бўлиб ҳисобланиши, шундай бўлган тақдирда Исроил бунга “кескин жавоб бериши”ни билдирган. Нетаняҳу, агар “Ҳизбуллоҳ” келишувни бузса, Исроил зарба беришини қўшимча қилган.

“Яхши битим дегани риоя этиладиган битимдир ва биз унга риоя қиламиз”, дея иқтибос келтирган Нетаняҳу сўзларидан The Times of Israel нашри.

Исроил бош вазири “Ҳизбуллоҳ” бир йил аввалги гуруҳ эмаслигини, исроиллик ҳарбийлар уни “ўн йиллар орқага” суриб ташлашганини билдирган. Нетаняҳуга кўра, армия нафас ростлашга муҳтож ва у ўз диққат-эътиборини Эрон томонидан келаётган таҳдидга қарши курашга қаратиши лозим.

Сулҳ режасида Исроил қўшинларининг 60 кун ичида Ливандан олиб чиқиб кетилиши кўзда тутилган. Исроил чегараолди ҳудудлари устидан назоратни Ливандаги ҳукумат армиясига топшириши, “Ҳизбуллоҳ” эса ўзининг оғир қуролларини Литаний дарёси шимолига олиб кетиши лозим бўлади. АҚШ тинчлик режаси бажарилишини назорат қилиши ҳамда “Ҳизбуллоҳ” сулҳ шартларини бузган тақдирда, Исроилга дастак кафолати бериши керак бўлади.

Эрон томонидан дастакланган ва қароргоҳи Ливанда бўлган “Ҳизбуллоҳ” гуруҳи Фаластиндаги ҲАМАС гуруҳининг (АҚШ ва ЕИда террор ташкилоти деб тан олинган) 2023 йил 7 октябридаги Исроил жанубига ҳужумидан кейин Исроилга ҳужумларни кучайтирган. Бунга жавобан Исроил сентябрь ойида Ливан жанубида “Ҳизбуллоҳ”га қарши ҳарбий амалиёт бошлаган. 1 октябрь куни Исроил армияси Ливанда қуруқликдаги амалиётга киришган.

“Ҳизбуллоҳ” АҚШ ва Исроилда террор ташкилоти деб тан олинган. Европа Иттифоқида “Ҳизбуллоҳ”нинг ҳарбий қаноти террор ташкилоти ўлароқ тан олинган, Ливан парламентида ўз депутатларига эга “Ҳизбуллоҳ” сиёсий партияси эса ЕИ наздида террор ташкилоти эмас.

Хитойдаги суд мамлакатдаги энг йирик давлат банки раёсати раиси ва партия котиби Лю Лянгэни жазо ижросини кечиктириш шарти билан ўлим жазосига ҳукм қилди. У коррупцияда ва ноқонуний равишда кредит берганликда айбдор деб топилган.

Лю активлари ҳажми бўйича дунёдаги энг йирик банклар бешлигига кирувчи Хитой банкини бошқарган. У 2023 йили Коммунистик партия сафида чиқарилган, шу йил февраль ойида эса ишдан бўшатилиб, қўлга олиниб, 121 миллион юандан кўпроқ (тақрибан 16,8 миллион миллион АҚШ доллари) миқдорда пора олганликда айбланган.

"Лю коррупцияга қарши кураш кампанияси остига тушган мамлакат молия секторининг энг юқори лавозимли вакилига айланди", деб ёзган South China Morning Post газетаси.

Ҳукм жазони икки йилга кечиктириш шарти билан чиқарилган, дея хабар қилди “Синьхуа” агентлиги. Лю сиёсий ҳуқуқлардан бир умрга маҳрум қилинган, унинг бутун мулки мусодара этилган. Хитой қонунчилигига кўра, кечиктирилган ўлим жазоси умрбод қамоқ жазоси билан алмаштирилиши мумкин.

Ўлим жазосига ҳукм қилиш ва уни ижро этиш бўйича Хитой дунёда биринчи ўринда туриши тахмин қилинади. Мамлакат бунга оид статистикани эълон қилмайди, бироқ ҳуқуқбонлар баҳосича, Хитойда йилига бир неча минг ўлим жазоси ҳукми чиқарилади, дейилган Amnesty International халқаро инсон ҳуқуқлари ташкилоти ҳисоботида. Бу дунё бўйлаб чиқарилган ўлим жазоларининг ҳаммасидан ҳам кўпроқдир. 2023 йилда ташкилот ўлим жазосига оид 1153 та ҳолатни қайд этган.

Жорий йилнинг 26 ноябрь куни уюшган тартибда ишга жалб қилинган меҳнат муҳожирларининг РФда яшаш рухсатномаси ёки фуқаролик олишини тақиқлаш кўзда тутилган қонун лойиҳаси Россия Давлат думасига кўриб чиқиш учун киритилади. Бу ҳақда давлатга қарашли “РИА Новости” агентлиги “Адолатли Россия — Ҳақиқат учун” (“Справедливая Россия — За правду”) фракцияси вакилларидан олинган маълумотга таянган ҳолда хабар қилди.

Фракция депутатлари бу каби мигрантларнинг оила аъзолари ва яқин қариндошларининг ҳам Россияга киришини тақиқлашни таклиф қилишмоқчи.

Бундан ташқари, лойиҳадан меҳнат муҳожирларининг Россияда бўлиши меҳнат шартномаси муддати билан чекланишига оид таклиф ҳам ўрин олган. Бу муддат тугаганидан кейин хорижлик ишчи РФ ҳудудини тарк этиши шарт бўлади.

Иш берувчиларга эса мигрантнинг уйга қайтиши билан боғлиқ харажатлар учун маблағ сақланажак махсус ҳисобрақами очиш мажбурияти юкланиши кўзланмоқда. Қонун лойиҳасида айтилишича, бундай ҳисобрақамнинг бўлиши меҳнат муҳожирининг Россия кириб келиши учун мажбурий шартга айланиши лозим.

Тбилисида 25 ноябрь куни бундан бир ой муқаддам сайланган парламентнинг илк мажлиси бўлиб ўтган. Мазкур сессияга мамлакат президенти Саломе Зурабишвили келмаган. У қонун чиқарувчи органнинг ҳозирги таркибини “конституцияга зид” ва “нолегитим” деб ҳисоблайди, чунки, Зурабишвили” фикрича, 26 октябрь куни ўтказилган овоз бериш натижалари “ёппасига сохталаштирилган”.

Мухолифат коалициялари лидерлари ҳам парламент мажлисини бойкот қилишган ва президент Зурабишвили бошчилигида “муқобил парламент” шакллантириш лозимлигини айтишмоқда.

Шунга қарамай, расмий маълумотларга мувофиқ, сайловчиларнинг 54 фоизи овозини олган “Грузия орзуси” ҳукмрон партиясидан бўлган 89 нафар депутат парламентга сайланган 150 депутатнинг ваколатларини овоз бериш йўли билан тан олишган ва Шалва Папуашвилини спикерликка қайта сайлашган.

Мандат олганлар орасида “Грузия учун”, “Ўзгаришлар учун”, “Кучли Грузия” ва “Бирдамлик” мухолифат коалицияларидан сайланган 61 нафар депутат ҳам бор. Бироқ мухолифатчилар парламент йиғилишларида иштирок этмасликлари ва ҳатто депутатликдан воз кечишларини билдиришган. Улардан бири – Михаил Саакашвилининг “Бирдамлик” партиясини тамсил этувчи Гогита Вашадзе аллақачоноқ депутатлик ваколатларини топширган. Бошқа депутатлар ҳам яқинда унга эргашишлари кутилмоқда.

“Кучли Грузия” коалицияси асосчиси Мамука Хазарадзе таклифига кўра, мухолифатчилар мухолифатнинг мувофиқлаштирувчи кенгашини тузишмоқчи. Хазарадзе уни “муқобил парламент” деб атаган.

Президент Зурабишвили “Грузия орзуси” вакилларидан тузилган парламенти нолегитим деб ҳисоблайди, чунки у парламентнинг илк ялпи мажлисини чақириш тўғрисидаги фармонни имзоламаган, Конституцион суд эса президентнинг 26 октябрдаги сайловларни “бўлиб ўтмаган” деб тан олинишига оид даъво аризаси бўйича ҳали қарор қабул қилган эмас.

25 ноябрь куни эрталаб ҳукмрон партия асосчиси миллиардер Бидзина Иванишвили дохил “Грузия орзуси”нинг 89 нафар депутати ИИВ махсус топшириқлар бажарувчи қисмининг кучли қўриқлови остида парламент биносига кириб олишган. Мухолифатнинг минглаб фаоли, гарчи парламент биносини тўлиқ иҳота қилиб ололмаган бўлса-да, уни уч томондан ўраб олган ва депутатлар ортидан “руслар” ва “Путиннинг қуллари” деб қичқиришган. Бу ҳаракатлари билан улар мухолифат ҳаракатининг, шунингдек, амалдаги президент Зурабишвили ҳамда айни пайтда қамоқда бўлган учинчи президент Михаил Саакашвилининг 26 октябрдаги сайлов “Владимир Путин розилиги билан амалга оширилган Россиянинг махсус амалиёти” эканига оид асосий тезисини ёйинлашган.

Ғарб мамлакатларининг кўпчилиги Грузия расмийларини сайлов якуни ва янги парламент шакллантирилгани билан табриклашга ҳозирча шошилмаяпти.

Венгрия бош вазири Виктор Орбан ва Словакия бош вазири Роберт Фицодан бошқа европалик бирор лидер Иванишвили ва унинг етовидаги “Грузия орзуси” билан бирга ишлашга тайёр эканини тасдиқлаган эмас, ваҳоланки Грузия ҳали ҳам расман ЕИга аъзоликка номзод мамлакат бўлиб ҳисобланади.

Бош вазир Ираклий Кобахидзе аввалроқ бир неча бор ўз мамлакати билан ғарб ўртасидаги муносабатлар президент Трамп инаугурацияси ва Украинада тинчлик ўрнатилганидан кейин нормаллашиши ҳақида гапирган. Парламент спикери Папуашвили эса декабрь ойида махсус коллегия Грузияга янги президент сайлашини маълум қилган. Бу лавозимга “Грузия орзуси”дан ким кўрсатилиши ҳозирча маълум эмас.

Россия Давлат думасига хорижлик фуқаролар ва фуқаролиги йўқ шахслар фарзандларининг Россия мактабларига қабул қилинишига оид қонун лойиҳаси киритилди. Унда мигрантларнинг фарзандлари мактабга киришда рус тилини “таълим олиш учун етарли даражада билиши”ни аниқлаш мақсадида тест топширишлари шартлиги белгилаб қўйилган. Мазкур тестдан ўтолмаган болалар мактабга олинмайди.

Қонун лойиҳасида тест жараёни бепул бўлиши, уни ўтказиш ва баҳолаш мезонлари эса эса Таълим вазирлиги ва “Рособрнадзор” ташкилоти томонидан алоҳида белгиланиши қайд этилган.

Режага мувофиқ, лойиҳа 10 декабрь куни биринчи ўқишда кўриб чиқилади. Ҳужжат батамом қабул қилинган тақдирда, мактабларга қабулнинг янги тартиби 2025 йил 1 апрелидан кучга киради.

Аввалроқ президент Путин “анъанавий қадриятлар”ни маъқул кўрган хорижий давлат фуқаролари ва фуқаролиги бўлмаган шахсларни Россияга кўчиб келишини осонлаштиришга оид фармонни имзолаган эди. Фармонда бу шахсларга “истисновий ҳолатларда” рус тилини билишини тасдиқловчи ҳужжатсиз ҳам вақтинча яшаш учун изн берилиши белгиланган.

Бундан ташқари, Кремль вакиллари аввалроқ Россия “демографик вазиятнинг таранглиги манзарасида суръат билан ривожланиш учун” меҳнат мигрантлари оқимига муҳтож эканини билдирган эдилар.

АҚШ президенти маъмурияти Украина учун Россия ҳудудига зарбалар беришда Американинг ATACMS баллистик ракеталаридан фойдаланиш бўйича чеклов олиб ташланганини илк бор расман тасдиқлади. Бу ҳақда Оқ уйнинг Стратегик коммуникациялар бўйича мувофиқлаштирувчиси Жон Кирби 25 ноябрь куни ўтказилган брифингда билдирган.

“Ҳозирнинг ўзида уларда [украиналикларда – таҳр.] ўзларини мудофаа қилиш учун зарурат туғилган тақдирда ATACMSлардан фойдаланиш имконияти бор. Бу ҳозирнинг ўзида Курск вилояти яқинида содир бўлмоқда”, деган Кирби.

АҚШ президенти Жо Байден Украинага Россия ҳудудидаги ҳадафларга узоқ манзилли ракеталар билан зарба бериш учун тақиқни олиб ташлагани ҳақидаги хабарлар ОАВда 17 ноябрь куни пайдо бўлган эди – бу ҳақда The New York Times нашри ва Reuters агентлиги АҚШ ҳукуматидаги манбалардан олинган маълумотларга таянган ҳолда ёзиб чиқишган. Бироқ бу маълумот олдин омма олдида расман тасдиқланган эмасди.

Россия Мудофаа вазирлиги 19 ноябрга ўтар кечаси Брянск вилоятидаги объектга олтита ATACMS ракетаси билан зарба берилганини маълум қилган. Москва Оқ уйнинг қарорини Ғарб мамлакатлари билан бевосита уруш ўлароқ баҳолашини билдирган.

Бирлашган Араб Амирликларида исроиллик раввин ўлимида гумонланган уч нафар ўзбекистонлик қўлга олиган. Бу ҳақда Reuters агентлиги БАА Ички ишлар вазирлиги маълумотига таянган ҳолда хабар қилди.

ИИВ баёнотига мувофиқ, қотилликда гумонланаётганларнинг исми Олимбой Тоҳирович, Азизбек Комилович ва Маҳмуджон Абдураҳим бўлиб, улардан икки нафари 28 ёшда, яна бири эса 33 ёшдадир.

Вазирлик баёнотида Бирлашган Араб Амирликлари расмийлари томонидан олиб борилаётган тергов давом этаётгани билдирилган, бироқ қўлга олинган шахсларга нисбатан айблов эълон қилиниб-қилинмагани очиқланган эмас.

Ўзбекистоннинг БААдаги элчихонаси Reuters агентлигининг бу борадаги сўровини жавобсиз қолдирган.

Бирлашган Араб Амирликларида 24 ноябрь куни Исроиллик раввин Цви Коганнинг жасади топилгани ҳақида Озодлик аввалроқ хабар қилган эди.

2020 йилдан буён БААда истиқомат қилаётган Исроил ва Молдова фуқароси Коган яҳудийларнинг “Хабад Любавич” ортодоксал диний ҳаракатини тамсил этиб келган.

Коганнинг автомобили Абу Дабидан 150 километр наридаги шосседа топилган. Амирлик расмийлари раввиннинг ўлдирилиш сабабларига оид бирор маълумотни очиқлашмаган.

Исроил бош вазири офиси ва Ташқи ишлар вазирлигининг қўшма баёнотида Коганнинг ўлими “мудҳиш антисемитча террор хуружи” деб аталган. Баёнотда айбдорлар қаерда бўлишларидан қатъи назар, Исроил уларни жавобгарликка тортиш учун барча имкониятларни ишга солиши ваъда қилинган.

Исроиллик собиқ сиёсатчи Айюб Қара 24 ноябрь куни Дубайда қилган чиқишида раввинга қирилган суиқасдда Эронни айблаган. Эроннинг Абу Дабидаги элчихонаси бу айбловни рад қилган.

Аввалроқ раввин ўлимида ўзбекистонлик уч нафар фуқаро гумон қилинаётгани, улар якшанба куни БААдан Туркияга учиб кетишгани ҳақида хабар қилинган эди. БАА ИИВ раввиннинг ўлимида гумонланаётган ўзбекистонликлар қаерда ва қай тарзда қўлга олинганига аниқлик киритган эмас.

Коганнинг ўлими БААдаги бир неча минг кишилик яҳудий жамоатини шокка туширган. Исроил Миллий хавфсизлик агентлиги мамлакат фуқароларига БААга сафар қилишдан вақтинча тийилишни тавсия қилган.

DHL ширкатига қарашли юк учоғи Вильнюс аэропорти яқинидаги икки қаватли тураржой устига қулаган, натижада кучли ёнғин келиб чиққан. Бу ҳақда Reuters ва Delfi агентликлари аэропорт ва Литва полицияси вакилларидан олинган маълумотга таяниб хабар қилишди.

Учоқда тўрт киши – икки учувчи ва ширкатнинг икки ходими бўлган. Delfi учувчилардан бири қутқарилгани, унинг ҳуши жойида экани ҳақида ёзган.

Хабарларга кўра, жабрланганлардан икки нафари касалхонага етказилган, бир киши вафот этган.

Қутқарувчилар Delfi’га учоқ қулаган уй турғунлари орасида жабрланганларга оид маълумот ҳозирча йўқлигини билдиришган. Воқеа жойида аэропорт ўт ўчирувчилари ишламоқда.

Flightradar24 хизмати маълумотига кўра, бу ерда гап Лейпцигдан Вильнюсга учган Boeing 737 юк учоғи ҳақида бормоқда.

Ноябрь бошида The Wall Street Journal нашри ғарб разведкаларидан олинган маълумотга таянган ҳолда июль ойида DHL юк етказиб бериш хизматининг Лейпциг ва Бирмингемдаги марказларида иккита посилка портлагани ҳақида хабар қилган эди. Тергов бомбалар электромассажёр шаклида бўлгани, уларнинг ичида электрон платалар ўрнида тез ёнувчи модда бўлганини аниқлаган.

Европа Иттифоқидаги бир неча мамлакат хавфсизлик хизматлари ходимлари логистика омборларидаги посилкалар портлаши АҚШдаги юк рейсларида Россия разведкаси томонидан портлаш уюштириш методи ишлови бўлганини иддао қилишган.

Ўтган ойда Польша расмийлари посилкадан ёнғин чиқиши сабабларини ўрганиш натижасида тўрт киши қўлга олинганини билдиришган. Ҳодиса АҚШ ва Канадага кетиши керак бўлган посилканинг Европага етказилиши чоғида содир бўлган. Польша прокуратураси баёнотига кўра, посилка ичидаги ашё қуруқлик ва ҳаво транспортировкаси чоғида ёниб ёки портлаб кетган.

Ғарб ҳукуматлари ва Европадаги разведка хизматлари аввалроқ Москвани Европадаги Украина иттифоқчилари бўлган мамлакатларда беқарорлик келтириб чиқаришга қаратилган қатор ёнғин ва саботаж ҳодисалари манбаси ўлароқ кўрсатишган.

Москва бу баёнотлар юзасидан изоҳ берган эмас.

Бирлашган Араб Амирликларида ўтган ҳафта йўқолиб қолган раввин Цви Коганнинг жасади топилган. Полиция тахминига кўра, у қотиллик қурбонига айланган. Коганда Исроил ва Молдова фуқаролиги бўлган.

Раввин Цви Коган 2020 йилдан буён БААда истиқомат қилиб, яҳудийларнинг “Хабад Любавич” ортодоксал диний ҳаракатини тамсил этиб келган. У 21 ноябрь куни йўқолиб қолган эди. Уни БАА полицияси ҳам, Исроил разведкаси ҳам қидирган. Улар одам ўғирлаш тахминини ҳам назардан соқит қилишмаган, муҳтамал буюртмачи ўлароқ эса Эрон махсус хизматлари кўрилган.

Аввалроқ Коганнинг автомобили Абу Дабидан 150 километр наридаги шосседа топилган. Раввиннинг ғойиб бўлишида махсус хизматлар ўзбекистонлик уч нафар фуқародан гумон қилишган, гумонланувчилар ўша куннинг ўзида БААдан Туркияга учиб кетишган. Қотилликда гумонланаётганлар шахсига оид маълумотлар очиқланган эмас.

Исроил бош вазири офиси ва Ташқи ишлар вазирлигининг қўшма баёнотида Коганнинг ўлими “мудҳиш антисемитча террор хуружи” деб аталган. Баёнотда айбдорлар қаерда бўлишларидан қатъи назар, Исроил уларни жавобгарликка тортиш учун барча имкониятларни ишга солиши ваъда қилинган.

Исроил Миллий хавфсизлик агентлиги мамлакат фуқароларига БААга сафар қилишдан вақтинча тийилишни тавсия қилган.

Россия армияси Украинага қарши урушда иштирок этиш учун Яманнинг юзлаб фуқаросини ёллаган. Бу ҳақда 24 ноябрь куни The Financial Times газетаси ёлланганларнинг айримларидан олинган маълумотларга таянган ҳолда хабар қилди.

Яманликларнинг айтишларича, уларга кўп пул тўланадиган иш ва ҳатто Россия фуқаролиги ваъда қилинган. Бироқ яманликлар ҳусийларга алоқадор ширкат орқали Россияга келганларидан кейин уларни мажбуран Россия Қуролли кучлари таркибига киритишиб, олд жабҳага йўллашган.

FT тахминига кўра, яманликларни ёллаш ишлари жорий йилнинг июль ойида бошланган. Яманликларнинг Украинадаги фронтда пайдо бўлишини нашр одам савдоси бўйича яширин амалиёт натижаси, деб атаган. Мақолада бу ҳолат Москва билан Ямандаги Эрон дастаклаётган исёнчи ҳусийлар гуруҳи ўртасидаги алоқалар кучайиб бораётганидан далолат экани айтилган.

Яманлик ёлланмаларнинг Украинага йўлланиши талафотлар ортиб бораётгани туфайли урушга тобора кўпроқ чет элликлар жалб қилинаётгани, Кремль эса тўлақонли ҳарбий сафарбарликка йўл қўймасликка интилаётганидан даракдир, дея қайд этилган The Financial Times материалида. Газетанинг қўшимча қилишича, Россия томонидан урушга жалб қилинаётган хорижликлар ичига Ҳиндистон, Непал фуқаролари ҳамда Шимолий Корея мунтазам армиясининг 12 мингга яқин жангчиси ҳам киради.

Яманлик фуқароларнинг Украинага қарши урушга ёлланаётганига оид мақолада Москванинг бунга нисбатан муносабати келтирилган эмас.

Туркияда 24 ноябрь оқшомида Россиянинг “Азимут” авиаширкатига қарашли Sukhoi Superjet 100 йўловчи учоғида Анталия аэропортига қўнганидан кейин ёнғин чиқди. Учоқ Россиянинг Сочи шаҳридан учиб келган, унинг бортида 95 киши бўлган. Дастлабки маълумотларга кўра, ҳодиса чоғида ҳеч ким жабр кўрган эмас. Ёнғин ўчирилган.

Туркия авиация расмийларига кўра, учоқда 89 нафар нафар йўловчи ва 6 нафар экипаж аъзоси бўлган. Росавиация иддаосича, уларнинг барчаси эвакуация қилинган ва қурбонлар бўлмаган.

Mash ва Baza телеграм-каналларининг йўловчилар маълумотига таянган ҳолда хабар қилишларича, учоқ иниш чоғида қўниш йўлагига қаттиқ урилган, шундан сўнг ундан ёқилғи оқиб кетган. Авиаширкат вакиллари ТАСС агентлигига кучли шамол туфайли “қаттиқ қўниш” бўлганини тасдиқлашган.

Гувоҳлар даставвал учоқнинг двигатели ёна бошлагани, кейин эса аланга бошқа жойларга ўтганини айтишган. Турк матбуотига кўра, воқеа жойига қутқарув хизматлари етиб борган, ҳодиса бўйича текширув бошланган.

AirportHaber сайтига кўра, Анталия аэропорти вақтинча рейсларни қабул қилмай қўйган. Учиш-қўниш йўлаги авария туфайли ёпилган.

Октябрь ойида Минеральние водидан Ивановога қатновни амалга ошираётган Superjet ёниб кетгани ортидан Москвадаги Внуково аэропортига фавқулодда қўнишни амалга оширганди. Қўниш пайтида учоқнинг пастки қисмида учқунлар чақнаши кузатилган, дейилган Росавиация ҳисоботида. Ўшанда учоқ бортида 98 нафар йўловчи ва 4 нафар экипаж аъзоси бўлган, ҳодиса чоғида ҳеч ким жабрланмаган.

2019 йили Москвадаги Шереметьево аэропортида “Аэрофлот” авиаширкатига тегишли Sukhoi Superjet 100 учоғи қўниш йўлагига урилгани ортидан ёниб кетган эди. Ўша пайтда учоқ бортида бўлган 78 кишидан 41 нафари ҳалок бўлган. Экипаж командири Денис Евдокимов 2023 йили олти йилга қамалган.

Евдокимовнинг адвокатлари фожиага шассининг ерга қаттиқ тегиши натижасида ёқилғи тўкилишига олиб келган учоқдаги конструктив камчиликлар сабаб бўлганини таъкидлаган: уларга кўра, шасси тиргаклари ерга урилиш чоғида ёқилғи бакларини тешиб қўйгани иддао қилинган.

Озод Европа/Озодлик радиоси татар-бошқирд хизматининг журналисти Алсу Курмашевага Журналистларни ҳимоя қилиш қўмитасининг матбуот эркинлиги учун халқаро мукофоти тақдим этилди. Мукофотлаш маросими 21 ноябрь куни Нью-Йоркда ўтказилди.

“Бугун мен учун бу мукофотни олиш катта шараф. Мен уни Озод Европа/Озодлик радиосида ишлаган ва ҳозирда иккиси Беларусь (Игорь Лосик ва Андрей Кузнечик), бири Қрим (Владислав Есипенко), яна бири Озарбайжон (Фарид Меҳрализода) қамоқхоналаридан бўлган ҳамкасбларим номидан қабул қиламан. Қамоқхонадаги журналистлар шунчаки статистика эмас, улар мен каби уйларида оиласи ва фарзандлари кутиб ўтирган одамлардир, улар озод қилиниши лозим”, дея билдирди Алсу Курмашева минбардан туриб.

У Россиядаги қамоқхоналарда айни пайтда 20 дан зиёд журналист сақланаётганини ҳам эслатди. Курмашева Журналистларни ҳимоя қилиш қўмитасига ўзининг озод қилинишига сабаб бўлган барча саъй-ҳаракатлари учун миннатдорлик билдирди.

Алсу Курмашева Россия қамоқхонасида 288 кун ўтказган. У Россия армияси тўғрисида фейк тарқатганликда айбланган.

Алсунинг таъқиб қилинишига Озодликнинг “Идель.Реалии” таҳририяти томонидан ёйинланган “Йўқолсин уруш. Украинага бостириб кирилишига қарши чиққан 40 нафар россияликнинг ҳикояси” (“Нет войне. 40 историй россиян, выступающих против вторжения в Украину”) китоби сабаб бўлган. 19 июль куни Татаристон Олий суди журналист аёлни 6,5 йилга озодликка маҳрум қилиш ҳақида ҳукм чиқарган. Курмашева 1 август куни АҚШ ва Россия ўртасида маҳбус алмашиш доирасида озодликка чиққан эди.

Матбуот эркинлиги учун мукофотни Ғазо секторида фаолият юритувчи фаластинлик журналист, продюсер ва тадқиқотчи аёл Шрук ал-Айла, гватемалалик журналист аёл Кими де Леон, Нигердаги энг таниқли суриштирувчи журналист аёл Самир Сабуга ҳам берилган.

Россиянинг Курск вилоятида Шимолий Корея армиясининг генерали ярадор бўлган. Бир қисми Украина Қуролли кучлари томонидан назорат қилинаётган Курскда украиналикларга қарши курашаётган Россия қўшинлари таркибида шимолий кореялик аскар ва зобитлар жанг қилаётгани ҳақида аввалроқ хабар қилинган эди. КХДР генерали “яқинда” Украина қўшинлари томонидан Курскка берилган зарбалар чоғида жароҳат олгани тўғрисидаги хабарда ҳодисага оид бошқа тафсилотлар келтирилмаган.

Мазкур хабар даставвал The Wall Street Journal нашри томонидан ёйинланган.

Шу тариқа, Россия томонида туриб Украина Қуролли кучларига қарши жанговар ҳаракатларда иштирок этаётган шимолий кореялик юқори лавозимли ҳарбий РФ ҳудудида яралангани ғарблик расмийлар томонидан илк бор тасдиқланган.

The Wall Street Journal бир кун аввал Курск вилоятида шимолий кореялик ҳарбийларга КХДР Бош штаби бошлиғининг ўринбосари генерал Ким Ён Бок қўмондонлик қилаётгани ҳақида хабар қилган эди. Қайд этилишича, генералга КХДР қўшинларини Россия армиясига интеграция қилиш ҳамда уруш олиб боришнинг замонавий методларини ўрганиш топширилган.

Ким Ён Бок аввалроқ КХДРнинг махсус топшириқлар бажарувчи кучларига раҳбарлик қилган ва узоқ вақтгача сояда юрган. У Россия ва Шимолий Корея ўртасида стратегик ҳамкорлик тўғрисидаги шартнома имзоланган 2024 йил июнидан кейин икки мамлакатнинг ўзаро яқинлашуви манзарасида оммага таниқли шахсга айланган. Ўшандан буён генерал КХДР лидери Ким Чен Ин билан биргаликда расмий тадбирларда мунтазам равишда иштирок этиб келган, дейилган The Wall Street Journal мақоласида.

Аввалроқ Украина ташқи ишлар вазири Андрей Сибига Шимолий Корея аскарлари эвазига Россиядан технологиялар олишни истаётгани ҳақида билдирган эди.

Разведкалар маълумотига кўра, Россияда айни пайтда КХДРдан келган бир неча минг ҳарбий юрибди. Пентагон ҳисоб-китобига кўра, улар сони 11 минг нафарга етади.