Ўзбекистон Сенати раиси Танзила Норбоева тунги навбатчилик мажбурий меҳнат сифатида малакаланишини айтди.
"Мажбурий меҳнатнинг Халқаро меҳнат ташкилоти томонидан белгилаб берилган 11та сифати бор. У конвенцияга киритилган. Тунги навбатчилик, масалан, у мажбурлашга киради барибир. Чунки у ўз хоҳиши бўлмаса ҳам, кечаси билан ўтиришга мажбур", - деди Норбоева одам савдоси ва мажбурий меҳнатга қарши курашиш миллий комиссиясининг мажлисида.
Лекин Сенат раисига кўра, ҳашар, ўз ҳудудини тозалаш мажбурий меҳнатга кирмайди.
"Ўша битта-иккита одам хоҳламаса чиқмасин. Уни биров зўрламайди ҳам, қаттиқ гапиришга ҳам ҳаққи йўқ", – деб айтган Норбоева.
Сенат раиси "Обод қишлоқ", "Обод маҳалла" каби ҳукумат дастурлари доирасида бюджет ходимларининг ишга жалб этилишига ҳам тўхталди:
"Обод қишлоқ»нинг ишини қил» ёки тиббиёт ходимига даволаш, иш жараёнида бориб ўша ердаги ишни қилгин, дейиладиган бўлса, бу – мажбурий меҳнатга киради. Чунки у ўзининг функциясини бажармаяпти, бошқа ишга жалб қилиняпти", – деди Норбоева.
