Петербург метросида душанба куни содир этилган портлашни, дастлабки тергов натижаларига қараганда, худкуш амага оширган.
Бу ҳақда ҳуқуқ-тартибот тузилмаларидаги ўз манбасига таяниб хабар берган “Интерфакс” агентлигининг билдиришича, махсус хизматлар худкуш шахсини аниқлашга муваффақ бўлган.
“Версиялардан бирига кўра, Петербург метросидаги портловчи мосламани худкуш ҳаракатга келтирган. Дастлабки маълумотларга қараганда, у марказий осиёлик 23 ёшли шахсдир”, деб иқтибос келтиради “Интерфакс” агентлиги ўз манбаси сўзларидан.
Манбанинг айтишича, худкуш экани таҳмин қилинаётган шахс метрога портловчи мосламани рюкзакда олиб кирган.
“Воқеа жойида топилган қолдиқлар бу версиянинг тўғрилигига ишорат қилмоқда, яъни портлашни худкуш амалга оширган. Бироқ ДНК эспертизасидан сўнггина якуний хулосага келиш мумкин”, деб билдирган “Интерфакс” манбаси.
Россия президенти Владимир Путин 3 апрель куни кечқурун Петербург метросининг “Технология институти” бекатида жамоатчилик томонидан портлашда ҳалок бўлганлар хотирасига ташкил этилган мемориалга борди ва гул қўйди.
Путин бу ерда матбуот билан мулоқот қилишни истамади ва Федерал хавфсизлик хизматининг Петербург бошқармасида метродаги террор ҳужумига оид йиғилиш ўтказди.
АҚШ президенти Дональд Трамп Петербург метросида камида 11 одам ҳалок бўлган портлаш ортидан Россия президенти Владимир Путин билан телефон орқали суҳбатлашиб, халок бўлганларнинг яқинларига ҳамдардлик билдирди.
Бу борада матбуотга билдирган Россия президенти матбуот котиби Дмитрий Песков суҳбат чоғида “президентлар террорчилик ҳамкорликда ва келишилган ҳолда бартараф этиш мумкин бўлган ёвузлик” эканини таъкидлаганларини айтди.
БМТ бош котиби Антонио Гуттеришнинг матбуот котиби Стефан Дуяррич душанба куни БМТнинг Нью-Йоркдаги штаб квартирасида ўтган брифингда:
-БМТ бош котиби Санкт - Петербург метросида содир этилган портлашни қоралайди. Бош котиб ҳалок бўлганларнинг оилалари, Россия ҳукумати ва халқига чуқур ҳамдардлик билдиради. Бу ёвуз ҳаракат учун масъул бўлган шахслар жавобгарликка тортилиши шарт, - деб билдирди.
Россия ҳуқуқ мухофазаси органлари бомба портлатган яна бир шахс тўғрисида маълумотларни маҳаллий ОАВга сиздирди. РЕН телеканали хабар қилишича, улар метрода ўзини портлатган худкушнинг фамилияси Жалолов бўлиб, 23 яшар Россия гражданлигига эга бу йигит асли Қирғизистондан.
Назорат камераларидаги фотодан у қизил курткада бўлган ва метрога орқасида рюкзак осиб кириб кетган.
Метродаги портлашларга алоқадорликда гумонланиб фотосурати маҳаллий оммавий ахборот воситалари орқали тарқатилган мусулмон йигит ўзи полицияга келди. У ҳақиқатан 3 апрел куни метрополитендан фойдалангани ва портлашларга мутлақо алоқаси йўқлиги билдирган.
Айни пайтда, кўплаб марказий оммавий ахборот воситаларида "террорчи ўзи таслим бўлгани" тўғрисида ёлғон хабарлар тарқатилмоқда.
Рус блогерлари ва журналистлари томонидан "Ҳоттабич" деб лақаб қўйилган бу шахснинг фотоси бир неча соат ўтиб деярли барча оммавий ахборот воситаларида асосий гумонланувчи сифатида тарқатилган эди.
Бу хабар ортидан Интерфакс Россия ФСБсидаги манбасига таяниб Санкт-Петербург метросидаги портлашлар 23 яшар марказий осиёлик худкуш томонидан содир этилганини иддао қилиб чиқди.