Портлаш рўй берган Санкт-Петербург метросидан одамлар эвакуацияси якунланди.
Россия президенти Владимир Путин портлашда нобуд бўлганлар яқинларига ҳамдардлик билдирди. У махсус хизматлар раҳбарларидан ҳодиса юзасидан аллақачон ҳисобот олганини айтди.
- Портлаш сабаблари ҳозирча ноаниқ, шу сабабли бу ҳақда гапириш эрта. Тергов кўрсатади. Албатта, ҳамма вариантлар кўрилмоқда – ҳам маиший, ҳам криминал, ҳам террорчилик сабаблари, деди айни замонда Беларус президенти билан учрашаётган Владимир Путин.
Портлаш бўлган жойда Россия Миллий аксилтеррорчилик қўмитаси (НАК) ходимлари иш олиб бораётгани маълум бўлди. НАК Петербург метросида янги портлашлар олдини олиш мақсадида барча бекатларда поездлар ҳаракатланишини тўхтатганини билдирмоқда.
Петербургнинг Сенная майдонидан тўғридан-тўғри эфир олиб борилмоқда:
Свобода Радиоси гувоҳининг ҳикояси:
"Мен “Сенная плошчадь” бекатидан ўтиб бораётган эдим. Бирдан портлаш овозини эшитдим, кучли силкиниш ва порох ҳидини туйдим. Қўшни вагонда эса свет ўчиб қолди. Поезд тўхтамади. Кейинги бекатга бориб тўхтади ва одамлар вагоннинг синган деразаларидан тушиб, қоча бошлади. Метро ишчилари эса жароҳатланганларни олиб чиқа бошлади. Назаримда, тўртинчи ёки бешинчи вагон портлади. Мен камида тўрт жароҳатланган кишини кўрдим. Платформа тутунга тўлган эди, одамлар даҳшатга тушган ва енгил ваҳимада эди"
Гувоҳларга кўра, портлаш маҳаллий вақт билан соат 15ларда рўй берган.
Айни пайтда, «Парк Победы», «Электросила», «Московские ворота», «Фрунзенская», «Технологический институт», «Сенная площадь» ва «Гостиный двор» метро бекатлари ёпилган.
Интерфакс агентлиги ўз манбасига таяниб, "Петербург метросидаги портлашни худкуш содир этмаган, афтидан, вагонга ўрнатилган портловчи мослама ишга тушган", деб хабар қилди.