Azattyq: Қозоғистон пахтазорларидаги болакайлар
El Tuz: Милиционер трактор тагида қолиб ўлди
Озодлик 20 сентябрь куни Тошкент вилояти Ички ишлар бошқармасининг 25 яшар ходими Анвар Абдуллаев пахтадан қайтаётиб, автоҳалокатга учрагани ҳақида хабар қилган эди.
El Tuz сайти бу хабарни қайта босаркан, Ўзбекистонда йиллардан буён кузатилаётган пахта сиёсатига изоҳ ўрнида қуйидаги карикатурани чоп қилди.
Малоҳат Эшонқулова: Хазораспда ХМТ вакилларини алдашди
Якшанба куни Хоразм вилояти Хазорасп тумани пахта далаларидаги вазиятни кузатган ўзбекистонлик мустақил журналист Малоҳат Эшонқулова ва Ўзбекистон ҳуқуқ ҳимоячилари альянси раҳбари Елена Урлаевалар маҳаллий ҳокимият Халқаро меҳнат ташкилотлари вакилларини алдади, деб хабар тарқатди.
Малоҳат Эшонқулова Озодликка йўллаган овозли хабарида, жумладан, шундай деди:
- ХМТ кузатувчилари Хорзамга йўл олиши билан маҳаллий ҳокимият вакиллари пахтага ётоққа жўнатилган ўқувчиларни, ўқитувчилари, шифокорларни ва барча теримчиларни вақтинчалик ортга қайтаради. Бу ҳақда бизга шахсини ошкор қилишни истамаган ўқитувчи хабар берди. Фарзанди пахтадан эрта қайтганига хайрон бўлган она ҳам шуни айтди. ХМТ экспертлари кетганидан икки кун ўтиб эса барча теримчилар яна пахта даласига қайтарилган.
Улар якшанба куни Хазорасп туманидаги баъзи жамоа хўжаликларида мактаб ўқувчилари ҳам пахтага чиқарилганига гувоҳ бўлганини айтмоқда. Бундан ташқари, тумандаги коллеж ўқувчилари пахта далаларидаги шийпонларга 10 кунга ётоққа жойлаштирилганини хабар қилмоқдалар.
Икки фаол маҳаллий ҳуқуқ-тартибот идоралари эътиборини тортмаслик учун оддий уй бекалари кийимида юрганини айтиб, Озодликка бир неча сурат ҳам йўллади.
Telegram: Самарқандда ҳамширалар 150 долларга одам ёллаяпти
Озодликка йўлланган мактубда Самарқанд вилоятида шифохона ҳамширалари пахта теримига мажбуран чиқарилаётгани, чиқмайдиганлардан эса пул йиғилаётгани иддао қилинди.
Қуйида мактуб таҳрирсиз чоп этилмоқда:
"Самарканд шахар тиббиет бирлашмаси марказий шифохонаси хамширалари врачлари санитаркалар мажбуран пастаргом туманида пахта теряпти бормайман дейдиганлар 150$эвазига одам еллаяпти...шундай холат булаетган бир пайтда мактабларда 1-синф укувчиларининг ота оналаридан метталом ун, пахта учун, укитувчилар куни учун умумий хисобда 50,000 дан йигиб олиняпти..."
